Jugah udah ngaga peminta nyemilik PRS
Kaban Parlimen Bebas Lubok Antu Jugah Muyang minta nyemilik Parti Rakyat Sarawak (PRS).
Iya madah ngagai Borneo Post iya udah ngenataika peminta nyadi kaban parti nya tiga bulan ke udah, sereta enggau nya iya nadai ati deka nyemilik Parti Bangsa Malaysia (PBM).
Iya madahka PBM bisi mai iya masuk parti nya beberapa bulan ke udah tang ia nulak laban deka agi masuk PRS enggau Gabungan Parti Sarawak (GPS).
“Aku pechaya chara pemadu manah meri servis tauka gawa enggau mantu pengundi aku iya nya nengah GPS.
“Kenyau ari aku ngaku sukung aku ngagai perintah besai ke diatu nyadi Bebas enggau minta masuk GPS, aku ngasaika aku udah nyadi sebagi ari GPS,” ku iya.
Iya madahka tu dilempaika ngagai pemesai renggat atas PRS enggau Premier Sarawak Datuk Patinggi Tan Sri Abang Jobari Tun Openg, ti mega chairman GPS, ngaga pemutus bekaul enggau peminta iya.
Jugah menang sitak parlimen Lubok Antu ba taun 2018 nyadi chalun Bebas. Enda lama udah nya ia masuk PKR sereta ba bulan
Jun 2020 iya nyukung Perikatan Nasional nyadu parti bebas.
Iya beterima kasih ngagai chalun presiden PBN Zuraida Kamaruddin ke udah mai iya, tang iya madah diri enda ulih masuk parti nya laban ati iya udah bisi GPS.
Zuraida ensana madah ngagai pengarang berita ba siti pengerami di Kota Kinabalu madahka sida iya ngelaluka Kaban Parlimen Bebas Jugah enggau Kaban Parlimen Sri Aman Datuk Masir Kujat.
Masir lebuh ditelefon ditanya sekalika deka masuk PBM, iya enggai meri sebarang penerang.
Masir ningkilka diri ari PRS lalu masuk Parti Sarawak Bersatu (PSB) ba bulan Mac 2019.
Lalu ba bulan Mac taun tu, Masir madah diri ngelengka penuduk iya ba PSB, enggau ngaku sukung iya ngagai Menteri Besai Datuk Seri Ismail Sabri Yaakob.