SDNU dikearap ulih negika main asal ungkup peranak di mengeri
Gempung Nasional Dayak Sarawak (SDNU) dikearap ulih negi sereta ngetanka main asal komuniti nya kelebih agi di kandang mengeri.
Kaban Kunsil Nengeri (ADUN) Ngemah Anyi Jana madah, gerempung nya sama megai tanggungpengawa ti berat bekaul enggau pekara tu berindik ari mayuh pampang nya udah ditumbuhka di kandang mengeri.
“Kitai ngarapka SDNU ulih megai pangku pengawa nyaga adat, tradisyen enggau main asal kitai kelebih agi di kandang mengeri.
“Tu ngambika reta pesaka kitai ulih dijaga di kandang mengeri,” ku iya lebuh ti bejadi Pengerami Ngiling Bidai diatur Unit Seduan Gerempung Nasional Dayak Sarawak (SDNU) Sibu di Kampung Jeriah ditu.
Sama datai iya nya Pemancha Mathwe Ganggang, Chirman SDNU Sibu Chambai Lindong, Ketuai Unit Seduan SDNU Sibu Ngali Genam.
Bejaku bekaul pekara bukai, Anyi deka bekerejasama enggau gerempung ukai dikuasa perintah (NGO) Dayak mantu ngangkatka pelajar nembiak.
Nitih ku iya, tu beguna dikena ngangkatka tikas pelajar ngagairenggat ti tinggi agi.
“Aku deka bekerejasama enggau NGO kelebih agi SDNU dalam mantu ari sukut pelajar bala anak Dayak,” ku iya nerang.
Ku iya madah, palan servis iya mega sama meri bantu enggau chara sekali meri ngagai bala anak di DUN Ngemah dikena nampung pelajar ke renggat diploma enggau degree.
“Semina enggau pelajar aja ti ulih ngubah tikas pengidup kitai ngambika enda tinggal ari orang bukai. Pelajar baka senyata sereta guna kitai diatu dikena terus mansang lalu ulih nyamin pemujur jemah ila,” ku iya.
Anyi madah, perintah seruran siru bekaul enggau pelajar lalu nyendiaka bemacham bantu sereta inisiatif ngagai bala nembiak sekula ngelama tu.