7,000 menara telekomunikasyen di selampur Sarawak ba taun 2023
Juluk ari perintah nengeri tu iya nya dalam nentuka semua kandang endur di Sarawak bulih sambung internet ti laju
“Pemansang ti enda ngetu ari perintah tu iya nya inisiatif dalam nentuka semua kandang menua di nengeri tu bulih sambung telekomunikasyen ti laju lalu mungkur semua kelebih agi servis ” internet. Datuk John Sikie Tayai Menteri di Opis Premier Sarawak
TATAU: Perintah Sarawak ngeletakka juluk bisi 7,000 menara telekomunikasyen ulih ditembuka di selampur nengeri Sarawak nyentukka taun 2023, pia ku Menteri di Opis Premier Sarawak Datuk John Sikie Tayai.
Nitih ku iya, projek ngaga menara telekomunikasyen tu iya nya udah berengkah dipejalaika kenyau ari taun 2018 lalu dipejalaika nengah chara bererenggat ti nyengkaum semua sitak kelebih agi di genturung pendiau enggau rumah panjai.
Dalam taun tu ku iya, perintah udah ngeletakka juluk bisi 1,403 menara telekomunikasyen ulih ditembuka nyentukka pengujung taun tu lalu 2,466 agi deka ditembuka dalam taun 2023.
“Pemansang ti enda ngetu ari perintah tu iya nya inisiatif dalam nentuka semua kandang menua di nengeri tu bulih sambung telekomunikasyen ti laju lalu mungkur semua kelebih agi servis internet,” ku iya.
Sikie madah munyi nya lebuh ti bejaku maya bejadika program Bejadi Jalai enggau Ngiling Bidai Rumah Jampi Iran di Nanga Bulu, Jalai Sangan-Merit kena Hari Empat tu tadi.
Bejaku bekaul enggau status ti pemadu baru dalam ngangkatmanah jalai di sitak nya, iya madah, peminta ngangkatmanah jalai ke sitak Muput, Penyarai enggau Jalai ari Nanga Jenga ke Ulu Anap pengudah nya ke Pelagus, peminta ungkup ngangkatmanah jalai tu udah dianjung ke Opis Menteri Menua Pesisir enggau Premier Sarawak.
“Endang udah nyadi pekara ti dikemeratka perintah Sarawak iya nya enggau nentuka tetiap peranak ulih ngasaika perengkaguna jalai alun ti moden enggau manah, lalu pengudah nya ulih ngangkatka status sosioekonomi peranak ninting maya,” ku iya nerang.
Bejaku bekaul enggau pengawa bepilih besai ti deka diatur enda lam agi, Sikie ngelalau rayat kelebih agi di sitak Selangau, Kakus enggau Tamin ngambika nemu milih chalun ti endang ulih ngintu nasit rayat.
Nitih ku iya, anang ditandu nama ti nyadi dalam taun 2018 ke alai chalun ti dipilih enda ulih bejalaika tangugngpengawa ke udah diberi.
Dalam pekara ti sama, iya udah ngemendarka bantu geran Projek Mit Menua Pesisir (MRP) sepenyampau RM20,000 ngagai Komiti Pemansang enggau Pengelikun Genturung Pendiau (JKKK) lalu RM5,000 ungkup Biro Orang Indu Rumah Jampi.
Pemesai Opis Pelilih Menua Tatau Jabang Juntan enggau Ketuai Polis Pelilih Menua Tatau DSP Jame Rais entara ti bisi datai.