Nemuai, belajar ke Bintulu-Miri: Jauh pejalai tinggi peneleba

BINTULU-MIRI: Institut Pematih Pengajar Kampus (IPGK) Rajang udah mujur bejalaika program Nemuai Sambil Belajar ke bagi menua di utara Sarawak iya nya Bintulu engggau Miri.

Program tu dipejalaika berengkah ari 19 ngagai 22 Jun 2022. Sepenyampau 31 iku raban ari IPGK Rajang ti nyengkaum lapan iku pengelicha, 22 iku siswa pengajar ti ngambi Kus Jaku Iban enggau siku staf bisi ngulu pengawa tu.

Batang tuju program tu dipejalaika kena nyungkak penemu bala siswa pengajar enggau pengelicha senentang sejarah sereta asal penatai raban bansa Iban kelimpah ari nerenakka apresiasyen ngagai daya idup sereta nanggam kaul ti manah dalam komuniti.

Kelimpah ri nya, peneleba ti diulih nengah aktiviti sepemanjai program tu ulih dikena bala siswa pengajar dalam napi pengidup rama seraya ke neresa lalu belajarka penemu ti baru.

Pia mega, program nemuai sambil belajar tu meri tambah dalam pengawa belajar ngagai bala siswa pengajar.

Mayuh aktiviti ti ngerinduka ati digaga sepemanjai program nemuai sambil belajar ngagai bagi menua Bintulu enggau Miri, entara aktiviti ti bisi digaga maya hari keterubah iya nya ngelawa endur baka Taman Tumbina enggau Pantai Tanjung Batu di Bintulu.

Kena pagi Hari Satu (20 Jun 2022), bala pengelicha, staf enggau siswa pengajar IPGK Rajang mupuk ke Niah National Park, Miri. Gua Niah, siti palan sejarah ti dikerinduka bala temuai ngembuan aris ti berega.

Tembu pengawa ngelawa

Gua Niah, raban IPGK Rajang mupuk ke pasar Miri. Maya hari ketiga program nemuai sambil belajar, raban IPGK Rajang ngelawa Muzium Petroleum Sarawak enggau The Grand Old

Lady, tanda pengingat sejarah petroleum di Miri.

Beserimbai enggau program tu mega, dikena ngerapit sereta ngerichahka agi kaul entara semua raban IPGK Rajang, udah diatur pengawa makai serumpu seraya ti ngerami siswa pengajar Kus Jaku Iban PISMP Ambilan Jun 2018 ti udah mujur nembuka pelajar degree sida. Raban IPGK Rajang mulaika diri ngagai

IPG kena 22 Jun 2022 ba sebuah restoran ‘steamboat’ ti tebilang di Menua Minyak nya.

Mayuh penemu baru ti diulih sepemanjai program nemuai sambil belajar ngagai menua Bintulu enggau Miri. Program tu siti inisiatif IPGK Rajang kena meri penemu sereta peneleba ngagai siswa pengajar ti deka ngajar Jaku Iban ba sekula ila.

PENGINGAT: Bala pengelicha enggau siswa pengajar begambar ba tanda pengingat sejarah petroleum Miri.

BESEDIA: Bala pengelicha enggau siswa pengajar udah sedia deka ngelawa Gua Niah.

GAGA ATI: Bala pengelicha enggau siswa pengajar begambar ba palan ‘Ai Mata Lelengau’ iya nya Tanjung Batu.

TEMEGAH: Bala pengelicha enggau siswa pengajar berasai temegah laban udah mujur niki ngagai Gua Niah, meda pemanah palan nyimpan sejarah nya.

SILIK: Sekeda siswa pengajar benung macha informasyen pasal petroleum.

NYAMAI: Steamboat di tisi tebing tasik sambil meda matahari padam mua ke lemai.

WENDY