Sarawak agi begunaka injinir kimia, ulih nangkup peminta gawa dalam bidang nya
Sarawak begunaka urung 600 iku injinir kimia kena napi peminta guna pengereja pengawa ba projek Sarawak Integrated Sour Gas Evacuation System ba Perindustrian Petrokimia Park di Bintulu.
Premier Sarawak Datuk Patinggi Tan Sri Abang Johari Tun Openg madah dalam timpuh tiga hari ke udah kitai bisi kerejasama entara sebuah syarikat ari Thailand enggau PETRONAS ti deka nyerara(memisah) enggau ngemansangka gis masam (sour gas).
Karbon dioksida dipechah ti ngasilka gis masam (sour gas), ku iya.
“Sida deka begunaka 600 iku jurutera kimia. Dini kitai ngiga 600 iku tu? Tu baru sebuah loji. Kitai deka ngaga dua loji, laban sida Shell mega deka ngaga siti.
“Enti 600 iku sebuah loji, enti dua loji udah begunaka 1,200 iku jurutera kimia, dini ngiga?
“Enti kitai bisi pengelandik sereta nemu tauka udah bisi teknologi, orang kitai ti ngasilka gis nya,” ku iya.
Abang Johari mansutka pekara tu lebuh iya bejaku seraya bejadi Ekspo Pendidikan Sarawak ti diatur ba Dewan Jamilah, Yayasan Sarawak ditu, kemari.
Bejaku baru iya madahka, beduduk ari nya Yayasan Sarawak dipinta mantaika pekara tu laban tu ke pemanah jemah ila ungkup anak tauka raban nembiak negeri tu.
Bekaul enggau nya, ku iya, perintah Sarawak ngaga pemutus meri visa lima taun sekali ngambika pakar ari luar menua ulih bekunsi tauka ngelatih anak tauka nembiak di menua tu.
“Aku udah ngaga pemutus, perintah meri visa lima taun sekali ungkup saintis luar menua, lalu nembiak kitai belajar ba sida tu. Udah chukup lima taun sida pulai, nembiak kitai nukar laban kepakaran udah bisi,” ku iya.
Lebuh dipinta raban pengarang berita nerangka pasal gis masam (sour gas), pengudah tembu bejadi program nya, abang Johari madahka, gis masam (sour gas) tu asil pengawa nyerara (separation) natural gas ari baruh tanah, iya nya elemen gis tu dipechaka.
Elemen ti enda meri kualiti gis deka dikeluarka ari gis nya (sour gas) sereta selalu iya karbon dioksida, ku iya.
“Karbon dioksida ditanam baru dalam tanah, nya kebuah kitai bisi stor karbon, simpan karbon nya lalu ke bukai nyengkaum sulfur deka dikena,” ku iya.
Sama bisi ba pengerami tu kemari, Sekretari Perintah Negeri Sarawak Datuk Amar Jaul Samion (meda ngena chara online), Sapit Sekretari Perintah Negeri (Perambu enggau Pemansang Ekonomi) ti lalu nyadi Sapit Chairman Yayasan Sarawak Dato Sri Mohamad Abu Bakar Marzuki, Sapit Sekretari Perintah Negeri (Operasyen) Datu Dr Sabriah Putit, Direktor Opis Pelajar Negeri Sarawak Datu Dr Azhar Ahmad, Direktor Yayasan Sarawak Mersal Abang Rosli, apai indai enggau bala nembiak.