Temuai renggat antarabansa diperansang mansik bemacham produk Sarawak
Temuai ti datai ke pengawa pemandang ‘Specialty & Fine Food Asia 2022’ di Singapura diperansang mansik enggau silik mayuh agi produk Sarawak.
Menijer Dagang enggau Beranakka Puku STATOS TC Tan madah, bisi mayuh dagang enggau pengawa betukar mata duit entara Singapura enggau Sarawak dalam timpuh dua nyentukka tiga bulan nyin tadi kenyau ari pengawa muka garis entara menua.
Ku iya, mayuh pengari pengeluar udah sama enggau maya pengawa pemandang nya ti bisi 25 buah kompeni nyendiaka sampel produk enggau penerang sida bekaul Sarawak.
Produk ti dipandangka nyengkaum sambal laksa Sarawak, sambal ikan, kupi Liberica Sarawak Rainforest, the tusu tiga lapis, the botanikal Kokokam, tuak enggau mayuh agi.
Siti agi produk baru dalam dagang Singapura iya nya mayuh macham berau ari Lubok Nibong, Simunjan enggau tanah tinggi Bario.
Berau tu bisi chura ti asal ti ngembuan mayuh nutrisi sereta antioksida.
Penengkebang Begulai enggau Presiden Gerempung SME Sarawak Datuk Seri Charles Voon ti mega kaban ‘majlis Persekutuan
Perniagaan Sarawak’ madahka raban sida beterima kasih ngagai STATOS ti udah nentuka pengelanchar program nya diatur.
Nengah inisiatif tu, ku iya, sida nerima mayuh orang ti ngembuan pengerindu ari pedagang antarabansa bekaul enggau produk Sarawak.
Pia mega, Ketuai Pemesai Eksekutif STATOS Chew Chang Guan ngarapka mayuh agi produk enggau pengeksport deka ngatur kaul eksport ke Singapura.