Pengawa pemansik bekaul minyak bio ‘alga’ dipelaba tembu dalam timpuh enam bulan

Pengawa pemansik bekaul enggau ngasilka minyak bio ari ‘alga’ agi dipejalaika sereta dipelaba tembu dalam timpuh enam bulan tu.

Premier Sarawak Datuk Patinggi Tan Sri Abang Johari Tun Openg madahka, kitai deka mansik tauka meda sekalika minyak bio ti diasilka ari sumber ulih dikemaru tu ulih dijual tauka enda.

“Diatu kitai benung ngaga pansik (bekaul ngaga minyak bio ari ‘alga’), engka dalam timpuh enam bulan kitai ulih meda asil ari pengawa pemansik tu.

“(Pekara dipansik) Ari segi pemayuh ‘alga’ ke ditanam sereta ulih dikeluarka, pemayuh volume ke ulih ngasilka minyak, berapa liter ari sekilo alga.

“Enti rega iya patut sereta ulih dijual, kitai deka ngeluarka ngena chara tauka skala besai. Ari tu kitai ulih ngasailka minyak bio, lalu minyak tu dikena bilun (ke disebut) SAF (Sustainable Aviation Fuel),” ku iya.

Abang Johari nerangka pekara nya lebuh dikerandau raban pengarang berita pengudah iya bejadi Ekspo Pendidikan Sarawak ti diatur ba Dewan Jamilah ba Yayasan Sarawak ditu, kemari.

Ditanya bekaul enggau bansa ‘alga’ ke ulih ngasilka SAF, iya madahka pekara nya benung dipansik.

Berindik ari pekara nya, ku iya, Sarawak begunaka mayuh raban saintis enggau pakar ba bidang ti bekaul ari sistem pelajar.

“Kitai deka ke mayuh orang ti bisi latar belakang sains, tu baru alga, bedau hidrogen, ‘sourgas’ ke deka dikemansangka kitai.

“Reti iya pengereja pengawa kitai mesti sida ke pakar enggau bisi latih ba bidang sains, lebih agi diatu penyadi gaya hari ti angat ti begunaka orang ke nemu biologi enggau kimia.

“Kitai deka ke anak kitai ti bisi latih ari sukut ke ngena sains, enggau laban sains deka nambah nilai sumber ti mayuh ba negeri kitai,” ku iya.