Sarawak dipelabaka deka bulih asil SST ti nambah taun tu
Asil ngumpul dikearapka terus niki berindik ari rega minyak enggau gis ti niki ba renggat dunya, ku Abang Johari
“Semina dalam timpuh tiga taun kitai mujur ngumpul RM8.5 bilion SST ari produk petroleum di nengeri tu. Lalu kitai mega ngarapka asil digumpul taun tu deka terus nambah berindik ari rega ” minyak enggau gis ti niki.
KUCHING: Sarawak dipelabaka deka nerima mayuh agi asil ari ngumpul Chukai Dagang Nenegeri (SST) ba produk petroleum taun tu.
Premier Sarawak Datuk Patinggi Tan Sri Abang Johari Tun Openg madah, tu berindik ari rega minyak dunya ti udah niki diatu.
“Sarawak udah bulih asil ‘diketau’ ke mayuh pengudah kitai meri SST ngagai produk minyak enggau gis.
“Semina dalam timpuh tiga taun kitai mujur ngumpul RM8.5 bilion SST ari produk petroleum di nengeri tu. Lalu kitai mega ngarapka asil digumpul taun tu deka terus nambah berindik ari rega minyak enggau gis ti niki,” ku iya.
Iya madah munyi nya lebuh ti bejaku ba peneerami Makai Lemai Gawai Dayak Renggat Nengeri Sarawak 2022 di Palan Konvensyen
Borneo Kuching (BCCK) ditu, malam kilah ensana.
Berindik ari nya, Abang Johari madah, deka bisi siti agi pengerami ngintu ‘Gawai’ kena ujung taun tu.
“Gawai ti dipadahka tu iya nya asil ngumpul SST ke alai nya nyadika kelai kitai beterima kasih enggau asil diketau ti belimpah.
“Pengudah semua ti udah bebendar digaga kitai asil nya ulih diasaika lalu konsep tu endang dampih enggau aku.
“Laban rayat Sarawak deka ngetau nama aja ti diulih kitai ungkup pemaik semua,” kui iya.
Nyema Sarawak bisi ngembuan belanja ti tegap, ku iya, tu deka nentuka nengeri tu ulih bejalaika pelin pemansang ari baruh Pelin Strategi Pemansang Pengudah COVID-19 2030 (PCDS 2030).
“Nya kebuah ari baruh PCDS 2030, kitai bejaku bekaul enggau pekara ti mungkur rama, lalu kitai ngulihka asil ti manah, kitai deka bekunsika enggau semua orang.
“Tu iya nya konsep perintah Gabungan Parti Sarwak (GPS) ke alai kitai bekunsika pemujur begulai,” ku iya.
Beserimbai enggau tu, Abang Johari madah, Sarawak udah mujur ngulihka sekeda hak ari perintah besai.
“Pekara pengudah tu iya nya kitai mesti ngembuan penegap sukung di Parlimen maya pengawa bepilih besai ti deka datai.
“Aku pechaya kitai ulih neruska pengawa berandau bekaul Sempekat Malaysia 1963 (MA63),” ku iya.
Sama datai maya pengerami tu iya nya Sapit Premier Sarawak Datuk Amar Gouglas Uggah Embas enggau Dato Sri Dr Sim Kui Hian, Chairman Komiti Pengatur Pengerami Ngintu Gawai Dayak Dato Gerawat Gala enggau temuai dipebasa ke bukai.
Datuk Patinggi Tan Sri Abang Johari Tun Openg Premier Sarawak