RM3.6 bilion penyampau rikod dagang Sarawak, Australia dalam taun 2021
Sapit Premier Datuk Amar Awang Tengah Ali Hassan madahka Sarawak ngerikodka penyampau dagang entara Sarawak enggau Australia dalam taun 2021 iya nya bisi RM3.6 bilion.
Iya madah, dalam taun ti sama penyampau eksport Sarawak ke Australia iya nya bisi RM1.2 bilion lalu produk ti mayuh dieksport iya nya minyak petroleum mata, papan lapis enggau urea.
Pia mega penyampau import Sarawak ari menua tu iya nya bisi RM2.4 bilion, kelebih agi bijih enggau aluminium pekat.
“Taja ekonomi global bisi lubah, penumbuh ekonomi Sarawak maya 2021 dipelabaka antara tiga nyentuk empat peratus.
“Berindik ari aktiviti ekonomi kitai ti uah pulai baka selama enggau udah muka baru garis entara menua, penumbuh ti meruan dalam sektor luar enggau aktiviti domestik ti majak manah, kitai melabaka ekonomi deka ngerembai entara lima ngagai enam peratus taun tu,” ku iya.
Iya madah munyi nya lebuh ti bejaku maya ti nguluka delegasyen ari Sarawak enggau ‘Jaringan Meja Bulat Bersama Australia Malaysia Bussiness Chamber Western Australia’ (AMBCAW), di Perth, Australia bedau lama ti udah.
Beserimbai enggau tu, Awang Tengah ti mega Menteri Dagang Antarabansa enggau Beranakka Puku ngarapka aum nya ulih nentuka Sarawak enggau Barat Australia ulih berandau enggau silik sekeda bidang ti ulih diangkatka agi nengah kolaborasyen dalam dagang sereta mega pekara bukai kelimpah neresa palan beranakka puku ke bisi potensial.
Lebih 20 iku kaban AMBCAW udah ngulu aum nya.
Entara ti bisi datai iya nya Konsul Jeneral Malaysia Ahmad Fikri Zakian enggau Mandal Presiden ti mega pengempu AMBCAW Bernard Chia.
Delegasyen ari Sarawak mega sama disereta Sapit Mentari Dagang Antarabansa enggau Beranakka Puku Datuk Malcolm Mussen Lamoh, Direktor Unit Pemansang Ekonomi Sarawak Datu Abdullah Zaidel, Pemangku Sekretari Mendam Opis Menteri Dagang Antarabansa enggau Beranakka Puku (MINTRED) Dzulkornain Masron, Penyanding Penemu MINTRED Datuk Naroden Majais enggau Pemesai Khas MINTRED Datu Liaw Soon Eng.