Komuniti Dayak pechaya, nyukung Premier Sarawak megai nengeri tu
Komuniti Dayak pechaya penuh enggau chara ketuai Premier Sarawak megai nengeri tu dikena betapi enggau penguji ti datai.
Sapit Menteri di Opis Premier Sarawak (Pengereja Pengawa, Imigresyen enggau Matau Projek) Dato Gerawat Gala madah, tu nyata dipeda nengah mayuh macham polisi enggau program pemansang perintah dikena ngemansang enggau ngangkatka tikas pengidup sereta ekonomi peranak menua pesisir nyengkaum komuniti Dayak Sarawak.
Entara nya, ku iya, bisi program ti meruan dalam nentuka sambung jalai alun ungkup kandang menua pesisir ti ngaul ungkus bilion ringgit dipejalaika ungkup pemaik rayat.
“Kelimpah ari nya, pengawa numbuhka Unit Pekara Jalai Pengarap Bukai (UNIFOR) mega nyadika kelai perintah nengeri ngenuku enggau bebasaka ulih milih jalai pengarap kediri, enggau guna dikena nyaga pengelantang jalai pengarap enggau pekara bekaul komuniti ukai Islam.
“Pengawa numbuhka UNIFOR tu iya nya ti keterubah di Malaysia lalu nya endang dikelaluka sereta dipebasa komuniti Dayak kitai. Tu mih nyadika tanda penegap pegai Premier Sarawak kitai,” ku iya.
Iya madah munyi nya ba pengerami Makai Lemai Gawai Dayak Renggat Nengeri Sarawak 2022 ti dipenyadika Premier Sarawak ditu, malam kilah ensana.
Gerawat madah, komuniti Dayak chukup beterima kasih sereta pechayaka Premier Sarawak ti nyadi ketuai politik komuniti ti nyadi pengari keterubah dalam kabinet nengeri.
“Kitai bisi mega Sapit Premier Sarawak ari pengari Dayak iya nya Datuk Amar Douglas Uggah Embas ti mega nyadi Menteri Infrastruktur enggau Pemansang Palan Penyangkai Kapal lalu mega Menteri Pekara Wang enggau Ekonomi Baru Kedua.
“Pia mega, kitai bisi Dato Sri Dr Stephen Rundi ti nyadi Menteri Betanam Betupi Moden enggau Pemansang Kandang Menua, Datuk Roland Sagah Wee Inn ti nyadi Menteri Pelajar, Inovasyen enggau Pemansang Pengelandik, Datuk John Sikieti nyadi Menteri di Opis Premier Sarawak enggau sekeda sapit menteri nyengkaum aku empu,” ku iya.
Nitih ku iya, portfolio kabinet ti diberi ngagai sida tu relevan sereta entara penyungkak ti besai dalam pemansang menua pesisir ti endang nyadi seout komuniti Dayak.
Kelimpah ari nya, ku iya, program baka Ejensi Pemansang Ulu Rajang (URDA), Ejensi Pemansang Tanah Tinggi (HDA), Ejensi Pemansang Kandang Menua Utara (NRDA) enggau Ejensi Pemansang Besai Kandang Menua Samarahan (IRSDA) sama udah ditumbuhka.
Tu ku iya, dikena ngelengkaska pemansang sosio ekonomi enggau pemansang komuniti Dayak menua pesisir.
Beserimbai enggau tu, iya pechaya komuniti Dayak deka terus nyukung perintah nengeri ti dipegai Premier Sarawak ke ngembuan juluk, inovatif enggau pregmatik.
“Premier Sarawak mujur mantaika diri iya nya siku prang ti ngembuan juluk, pandai, insklusif enggau ketuai ti berani ungkup selampur rayat Sarawak,” ku iya.