Sarawak Pay ulih mantu orang dagang di menua pesisir
Kena mutarka penanggul sekeda bank ba luar Kuching ti suah napi penanggul suntuk duit ungkup pengawa transaksyen
“Diatu bisi siti chara ti dibantaika Premier Sarawak, awakka mudah, kelebih agi ba kita di menua pesisir, ambika ” chunto kena bejalaika dagang kita.
KUCHING:NgenaSarawak Government Fintech Platform (S PAY GLOBAL) tauka dikelala agi enggau nama Sarawak Pay ulih mantu orang dagang di menua pesisir ngulihka duit asil ari bedagang, pia ku Menteri ba Opis Premier Sarawak Datuk John Sikie Tayai malam, Hari Enam tu tadi.
Ku iya, nya kena mutarka penanggul sekeda bank ba luar Kuching ti suah napi penanggul suntuk duit ungkup pengawa transaksyen.
“Diatu bisi siti chara ti dibantaika Premier Sarawak, awakka mudah, kelebih agi ba kita di menua pesisir, ambika chunto kena bejalaika dagang kita.
“Enti kita semina ngarapka duit (mata duit )aja, baka sida ke jauh di ulu entigis, pekara tu nyadi siti pemar,” ku iya madah ngagai pengarang berita.
Iya dulu ari nya, ngulu pengerami ngiling tikai ti nyadi kelai kena nutup Gawai Dayak renggat negeri ti diatur ba Dewan Mensia Mayuh MBKS.
Ku Sikie, sida merambu deka ngemanjaika timpuh ngatur Bazar Gawai Daya ungkup bagi taun baru.
Nya berindik ari sambut ti manah ke dilawa beribu iku orang ti data datai nguji maka bemacham bansa pemakai Dayak enggau negeri tu kelimpah meli produk asil pengelandik jari.
“Nengah ripot ke diterima kami ari komi ti program, sambut bazar dalam kandang semilan hari nya chukup manah lalu asil ke diulih ari pengawa bejual nya manggai RM800,000.
“Nyengkaum malam tu asai aku, nya udah manggai urung RM1 juta. Tu chukup manah,” ku iya.
Sama bisi ngulu pengerami nya, Sapit Menteri Utiliti enggau Telekomunikasyen Datuk Liwan Lagang, enggau Sapit Menteri ba Opis Premier Sarawak (Tanah Adat enggau Kastam), Jefferson Jamit Unyat.
Sebedau pengerami ngiling tikai, Sikie meg abisi ngelawa sekeda palan bejual dia.
Aktiviti bukai ke bisi diatur sekumbang program sepuluh hari nya baka program Dayak-Orang Ulu, Iban enggau Bidayuh Art Night.
Tu nyengkaum beperindang enggau raban orkestra, Pekit Kumang enggau Keling ungkup pesereta ti beumur semilan nyentuk 15 taun, Gawai Idol sereta beperindang ba atas panggau begulai engagu artis ari negeri tu empu.
Menteri ba Opis Premier Sarawak Datuk John Sikie Tayai