Pemutus peminta Jugah Muyang nyemilik PRS dilempaika ba ketuai tetinggi parti, ku Sikie

Pemutus peminta Parlimen Lubok Antu, Jugah Muyang deka nyemilik PRS dilempaika ba ketuai tetinggi parti, sekalika nerima iya tauka enda.

Mandal Presiden PRS, Datuk John Sikie Tayai malam ensana madahka parti nya udah nerima peminta Jugah ke mega kaban parlimen ngatika diri nya.

“Peminta nya endang amat udah dianjung iya tang nya bepanggai ba ketuai tetinggi dalam PRS.

“Diatu bedau bisi aum diatur bekaul enggau pekara nya (saekalika nerima iya tauka enda),” ku iya.

Iya madah munyi nya lebuh ke dirandau pengarang berita pengudah ke ngulu Pengerami Ngiling Bidai

Bazar Gawai Sarawak 2022 ba Dewan Mensia Mayuh MBKS ditu, malam Hari Enam nyin tadi.

Ku Sikie, enti Presiden enggau Sapit Presiden udah ngaga pemutus, nya baru nemua gaya peminta iya.

“Nya dipeda positif laban iya deka nyemilik parti, tang kami ngelempaika nya ba ketuai tetinggi parti sekalika nerima iya tauka enda,” ku iya.

Bedau lama udah, Jugah bisi madahka diri minta nyadi kaban Parti Rakyat Sarawak (PRS).

Iya mega madahka diri udah ngajung peminta nyadi kaban tiga bulan ke udah laban iya nadai ati deka nyemilik Parti Bangsa Malaysia (PBM).

“Aku pechaya chara ke pemadu manah kena gawa enggau mantu pengundi aku iya nya nengah GPS (Gabungan Parti Sarawak).

“Kenyau ari aku madahka diri nyukung perintah besai lalu diatu tau minta nyemilik GPS, aku ngasaika diri udah nyadi sebagi ari GPS,” ku iya.

Jugah menang bepilih ba kerusi Parlimen Lubok Antu dalam taun 2018 nyadi chalun bediri ngatika diri.

Iya udah nya lalu nyemilik PKR, tang dalam bulan Jun 2020 iya madahka diri nyukung Perikatan Nasional.

Sikie lebuh ke ditanya pasal penyendia PRS kena napi Pengawa Bepilih Besai (PRU) ke deka datai, iya madahka raban pengawa bepilih parti endang semampai sedia napi pengawa bepilih ti deka diatur sebarang maya.