JPNS dipinta ngatur randau enggau apai Indai kena ngelala, mutarka penanggul sida
Opis Pelajar Negeri Sarawak (JPNS) dipinta ngatur sesi randau begulai enggau bala apai indai berindik ari gaya ekonomi ti enda meruan diatu, kelebih agi pengudah timpuh pandemik tu.
Kaban Kunsil Negeri (ADUN) Dudong Dato Sri Tiong King Sing madah, kebuah pia laban mayuh apai indai napi penanggul ba pekara belanja.
“Pengudah pandemik COVID-19, mayuh penanggul nyadi. Nyadi staf enggau pemesai perintah, sida mesti nemu penanggul apai indai.
“Nengah chara berandau, nya chara ngenyemakka diri enggau apai indai sereta ngelala penanggul sida lalu ngiga chara mutarka nya,” pia ku iya lebuh ke bejaku bejadi Pengerami Nyuaka Bantu Pekayan Sekula Yayasan Sarawak 2022 ba SJKC Thai Kwang ditu, kemari.
Pengerami nya diatur Yayasan Sarawak begulai enggau Palan Servis ADUN Dudong, Opis Residen Bagi Menua Sibu, Opis Pelilih Menua enggau JPNS.
Sama bisi ngulu pengerami nya, Pemangku Penulung Direktor Yayasan Sarawak (Bagi Program enggau Bantu) Mahathir Mohammad, Sapit Residen Bagi Menua Sibu Awang Mohammad Nizam, Pemesai Opis Pelajar Pelilih Menua Sibu Ahli Chikba enggau Kepala Pengajar SKJC Thai Kwang, Sio Siok Hie.
Tiong ke mega Ahli Parlimen Bintulu madah, iya sedia mantu nyendiaka palan ngatur sesi randau nya nyema JPNS tauka sekula bisi penaggul bekaul enggau pekara nya.
“Enti bisi penanggul ba sekula, kita tau ngatur nya ba hotel tauka ba endur bukai. Aku sedia mantu ba pekara tu.
“Kitai enggai meda meda panggul apai indai majak nyadi nyentuk ke bisi sekeda ari sida enda teanjungka bala anak sida ke sekula ketegal penanggul ti nuntung sida,” ku iya madah nyemetak.
Ku iya nengah chara berandau, penanggul apai indai nya ulih ditemu sereta diberi perati.
“Tu mih maya kitai mantu apai indai pengudah pandemik COVID-19 tu, laban udah tentu mayuh penanggul nyadi.
“Kitai enggai meda penanggul ke nuntung apai indai tu nyadi ke kebuah bala anak sida enda besekula,” pia ku Duta Khas Menteri Besai Ke Republik Rakyat China nya.
Berebak enggau nya, iya ngansak Yayasan Sarawak terus ngambi inisiatif mantu nembiak sekula sereta neruska bantu ke diatu nya kena ngurangka tating apai indai.
Ku Tiong, bisi 649 iku nembiak sekula dalam sitak DUN Dudong udah dipilih nerima baucher mata duit RM200 ari Yayasan Sarawak dikena meli pekayan sekula.
Ari penyampau nya ku iya, 368 iku nya nembiak sekula sekondari lalu 281 iku nembiak sekula primari.
“Taja pan bantu tu enda besai tang ulih mantu ngurangka tating belanja apai indai kelebih agi ari raban B40. Kami nemu gaya ekonomi diatu enda tentu manah.
“Inisiatif ke baka tu ari Yayasan Sarawakpatut dipajakka baru,” ku iya seraya ngelalau nembiak sekula ambika seruran nitihka prosedur operasyen standard (SOP) kena nyaga pengerai sida.
Iya mega ngarapka apai indai ngena bantu nya memanah sereta bulih pemaik ari nya.
Berebak enggau nya, Tiong mega bisi ngungkupka RM150,000 ngagai SJKC Thai Kwang kena mantu pengawa nyeruri sekula nya.