Projek Jalai Pasi-Tanjung Manis mega meri pemaik ngagai kandang menua tengah Sarawak
Projek ngaga Jalai Pasi ke Tanjung Manis ke beungkus RM321 juta deka meri pemaik ukai semina ngagai peranak di Sarikei aja tang mega ngagai semua kandang menua tengah tengah Sarawak.
Kaban Kunsil Negeri (ADUN) Repok Dato Sri Huang Tiong Sii madah, projek nya deka ngangkatka agi ikas sosioekonomi peranak dalam kandang menua nya.
“Kami ngarapka rayat ba kandang menua nya ulih meda pemansang nya nyadi siti ari peluang ti chukup manah kena nambahka penatai pemisi, lalu ngena nya nyadi ke platform ti pemadu manah dikena ngemajuka diri.
“Projek ngaga jalai tu ngem untangka bungkur jalai ungkup kandang menua tengah Sarawak.
“Rayat Sarawak patut besukur laban bisi siku ketuai ti meretika peneka rayat sereta semampai beratka semua aspek negeri tu, nyengkaum pemansang pemansang pelajar, ekonomi, sosial, infrastruktur, pengelantang pendiau enggau pekara, iya nya Premier Sarawak Datuk Patinggi Tan Sri Abang Johari Tun Openg,” ku Huang.
Iya bejaku munyi nya maya Pengerami Ngiling Bidai Gawai 2022 ti diatur Serakup Indu Dayak Sarawak (SIDS) Pampang Sarikei ba sebuah restoran ditu, kena malam Hari Enam nyin tadi.
Pengerami nya bela digulu kaban SIDS ari pampang Sibu, Selangau, Sibu Jaya, Bintangor, Sekuau, Mukah, Julau, Pakan, Roban nyengkaum kaban SDNU enggau DBNA.
Ba pengerami nya, Huang mega minta mensia mayuh besaup enggau Perintah Sarawak enda ngira ideologi politik, sama ngemansangka Sarikei kelebih agi sitak Repok.
Ku iya, penyerakup enggau sukung penuh ngagai Perintah Sarawak ari baruh
Gabungan Parti Sarawak (GPS), beguna amat kena nentuka hak Sarawak terus diintu sereta maju ke mua dalam semua aspek.
Berebak enggau nya, Huang mega madahka pengerami Ngiling Bidai Gawai tu ngelaika pengawa nutup Gawai Dayak lalu sedia napi taun baru.
“Nya besai amat reti laban ulih ngenanka tradisyen enggau adat bansa Dayak kelebih agi bansa Iban.
“Pengerami ke diintu enggau chukup richah tu mega dipeda ulih ngeratka penyerakup enggau tanggam kaul enggau pangan diri, seraya ngarapka pengerami ke baka nya ulih dipajakka ba taun bukai ke deka datai,” ku Huang.
Sama bisi ngulu pengerami nya, Chairlady SIDS Sarikei Rosy Jita, Sapit chairlady SIDS Sarikei Lily Tinggang enggau kaban SIDS ke bukai nyengkaum bala ketuai raban bansa dalam kandang menua.