KBK, Sub-Komiti Rekreasyen SDNU begulai ngatur Pekit Badminton Tetutup Dayak kena 22-23 Julai tu
Kelab Badminton Kenyalang (KBK) Biro Lumba enggau Main nengahkerejasamaenggau Sub-Komiti Rekreasyen SDNU, deka ngatur Pekit Badminton Tetutup Dayak ba Sentosa Sports Centre ditu, kena 22 enggau 23 Julai, berengkah ari pukul 8 pagi nyentuk pukul 7.30 malam.
Nitihka penerang berita ari KBK, pesereta semina diterima ari etnik Dayak enggau ke bisi darah bechampur asil ari pengawa jadi berupus, asalka siku ari apai tauka indai nya bansa Dayak.
“Orang ke bisi ati enggau bepekit tau datai mai surat pengada kena nentuka sida diterima masuk pekit nya,” pia ku penerang berita ari KBK.
“Badminton nya main ti popular ba rayat Malaysia lalu menua Malaysia nadaika enda teulihka midul lebuh ke enggau bepekit ba pekit besai baka Sukan
SEA, Sukan Asian, Sukan Komanwel, Pekit Renggat Dunya enggau Olimpik. Taja pia, nadai siku pan bansa Dayak bisi ngarika menua Malaysia dalam main badminton,” pia ku KBK.
“Nya alai, batang tuju ngatur pekit tetutup tu endang kena meransang mayuh agi raban bansa Dayak ngambi bagi dalam main nya kena ngelantangka ati enggau manahka pengerai, kelimpah ari ngiga orang ke landik bemain ambika diembing nyadi pemain negeri enggau ngagai renggat ke tinggi agi,” pia ku KBK.
Pekit tetutp tu deka dibagi ngagai mayuh bengkah kategori umur, semina ungkup nembiak bansa Dayak aja ke beumur baruh ari 12, 15 enggau 18, dalam main ‘single’
Kelimpah ari nya, raban bansa Dayak mega ditesau enggau bepekit dalam kategori ‘veteran double’ (umur ngelui ari 45) enggau kataegori ‘open double’ (nadai tatak umur).
Perais mata duit, setipikit enggau trofi bisi disediaka.
Raban pengatur pekit deka ngatur pengawa chabut undi ba Sentosa Sports Center pukul 7.30 malam kena 20 Julai.
Menijar enggau pemain dikemendarka nyadi saksi maya nya.
Pemutus enggau tusun jam bepekit nya deka dipadahka pukul 7.30 malam, 21 Julai.
Pom masuk pekit nya mesti dianjung ngagai raban pengatur sebedau 18 Julai tauka ngagai email anthonynili73@gmail.com tauka lumur whatsApp 014-5784618 (Anthony Ugor Nili).
Penerang ke silik nyengkaum chara mayar masuk pekit enggau penerang beguna ke bukai tau dipeda dalam pom masuk pekit nya.
“Orang ke kala masuk pekit ba renggat Sukan SEA, Sukan Asian, Sukan Komanwel, Pekit Renggat Dunya enggau Olimpik enda dikemendarka enggau bepekit.”
“Semina orang ke udah nembuka vaksinasyen COVID-19 dikemendarka enggau bepekit. Sesapa ke bisi kelai renga, tabin enggau rampit COVID-19 enda diterima enggau bepekit,” pia ku KBK madahka sekeda ari atur pekit nya.
Kena ngulihka penerang ke silik agi, mensia mayuh mega tau betelefon ngagai chairman Pekit nya Petrus Ngalih Tinggi ba lumur 011-19879606 enggau Pengadil Pekit nya ba lumur 014-5784618.