Sarawak numbuhka kebun orkid palan mansik ekonomi spesies orkid Borneo
KUCHING: Sarawak deka ngemansangka kebun orkid ke deka nyadi palan mansik ekonomi spesies orkid Borneo kelimpah ari matih orang ke bekebun ngemeranka utai tanam pengias komersial nya.
Premier Sarawak Datuk Patinggi Tan Sri Abang Johari Tun Openg madah, ke tuju nya perintah negeri deka ngungkupka RM5 juta ti nyadi duit turu keterubah kena ngemansangka kebun nya.
“Tadi aku diberi Opis Kampung Sarawak (JHS) penerang pasal orkid. Aku meda orkid siti ari asil biodiversiti kitai laban orkid Borneo bebida enggau orkid bukai.
“Saya mega bisi meda sekeda spesies orkid ti manah, nya kebuah minta (Direktor JHS) Hamden (Datu Hamden Mohammad) enggau Opis Kampung numbuhka siti kebun orkid,” ku iya.
Iya bejaku munyi nya nggai pengarang berita pengudah bejadi Pengerami Ngintu Hari Kampung Antarabansa (HHA) Negeri ba Palan Mansik Kampung Industri (IFRC) di KM20 Jalai Puncak Borneo, kemari.
Ku Abang Johari, kebun orkid ti deka dikemansangka nya ukai baka kebun orkid ke diatu laban nya deka disikap ngena makmal enggau gajet digita kena meanalisis utai tumbuh nya.
“Ba kebun nya ila, pansik ke deka dipejalaika baka ngasilka orkid hibrid ti ngembuan gamal enggau chura ke manah agi.
“Nya mega deka ngena semua gajet digital dikena meanalisis orkid lalu nempa chara ke pemadu manah kena ngasilka orkid ba penyampau ke mayuh ke tujuan komersial tauka eksport,” ku iya.
Ku iya baru, projek ngaga kebun nya deka dipunka pengudah palan alai numbuhka nya dikelala.
“Nya deka nyadi pansik ekonomi ti deka dikemansangka kitai semak enggau taba Palan Biodiversiti Sarawak (SBC) di Semenggok tu.
“Enti udah tembu digaga ila, nya deka nyadi kompleks mansik ungkup Opis Kampung enggau latih ngagai orang bekebun ambika raban tu ulih ngemayuhka utai tanam sida nengah nanam orkid,” ku iya.
Ku iya industri nanam orkid tauka anggerik bisi potensial tinggi laban industri bungai chukup besai di serata dunya.
Ku iya, bisi dua menua ti mayuh ngimport orkid iya nya Belanda enggau China.
Dulu ari nya lebuh ke bejaku bejadi pengawa nya, Abang Johari madahka enggau pemisi kebun orkid nya, sektor peribit enggau orang bekebun ulih belajarka chara ti betul nanam orkid tnyengkaum sekeda bungai bukai ti ngembuan rega komersial ti tinggi.
“Kelebih agi Orkid enggau bungai tau meri penatai pemisi ke besai laban ngembuan rega komersial ke tinggi.
Sama bisi ngulu pengerami nya, Sapit Menteri ba Opis Premier Sarawak (Integriti enggau Ombudsman) Datuk Juanda Jaya, Direktor JHS Datu Hamden Mohamad, Duta Besai Jepun ke Malaysia Takahashi Katsuhiko enggau Konsulat Jeneral Republik Indonesia di Kuching, Raden Sigit Witjaksono.