Uggah dichiri nyadi Pro Canselor UNIMAS ke baru

KOTA SAMARAHAN: Majlis Konvokesyen Komemoratif Universiti Malaysia Sarawak (UNIMAS)ti diatur berengkah ari 27 nyentuk 29 Jun udah nyiri Sapit Premier Sarawak Datuk Amar Douglas Uggah Embas nyadi Pro Canselor baru universiti.

Pengawa nya udah dikemujurka Premier Sarawak ke mega Pro Canselor UNIMAS, Datuk Patinggi Tan Sri Abang Johari Tun Openg ba hari keterubah konvokesyen di Dewan Tunku Abdul Rahman Putra (DeTAR) UNIMAS ditu, ensanus.

Uggah lebuh ke bejaku meri terima kasih ngagai Tuai Megai Menua ( TYT), Tun Pehin Sri Abdul Taib Mahmud enggau ketuai perintah negeri ti ari baruh pegai Premier Sarawak Datuk Patinggi Tan Sri Abang Johari Tun Openg enggau ketuai UNIMAS laban udah pechayaka iya ti ngujungka lalu nyiri iya nyadi Pro Canselor UNIMAS.

“Aku enggau ati ti baruh nerima tu lalu tu nyadi ti pengarap ati enggau tanggungpengawa ti chukup besai kena nempa lalu nyadi ke peransang UNIMAS sebagai sebuah universiti ke tebilang di rantau tu.

“Keli pah ari nya, UNIMAS ulih mai pemaik ngagai pengelantang mensia mayuh enggau pemanah menua, sereta mai nama UNIMAS majak manah ba renggat antarabansa,” ku iya bejaku maya Pengerami Konvokesyen Komemoratif UNIMAS di DeTAR, ditu, ensanus.

Ku Uggah, nyadi institusyen pelajar tinggi ke pemadu beguna, UNIMAS mesti bejalaika pengawa ukai semina ngemansangka modal mensia, tang mega ngadaka mensia kelas lemur satu ti bisi pengelandik ngerembaika pemansang komuniti.

“Dngena pengelandik ti dikembuan dalam bengkah disiplin penemu, aku pechaya UNIMAS deka nyadi penegap ngagai pemansang negeri.

“Nya alai, UNIMAS dipinta lebih agresif sereta nimpai jauh ba pengawa ngemansangka kurikulum baru ti ulih nangkup guna industri sereta relevan ba pengawa ngemansangka mensia mayuh,” ku iya.

Ba pengerami ke sama, Uggah mega mega ngenataika pengaga ati ngagai graduan UNIMAS ti udah mujur nembuka pelajar sida.

Berebak enggau nya, Mandal Canselor UNIMAS Profesor Datuk Dr Mohamad Kadim Suaidi madah, Pro Canselor UNIMAS ti dichiri Canselor nya diungkupka ari baruh Tusun Keterubah , Seksyen 8 (1),Konstitusyen Akta Universiti enggau Kolej Universiti 1971 ubah 2009, 2012 enggau 2019.

Ku iya, nyadi Pro Canselor baru UNIMAS, iya (Uggah) mesti deka meda UNIMAS nyingkang ke mua nuju penyulut dalam akademik, pansik enggau publikasyen setipak enggau visyen sereta misyen UNIMAS nyadi sebuah universiti global ke tebilang.

“Ngembuan sejarah nyulut dalam pelajar, Datuk Amar Douglas Uggah Embas u lih ngangkatka penyulut UNIMAS ngagai ikas ke tinggi agi jemah ila,” ku iya.