TPM: Isu 1/3 kerusi Parlimen Sabah, Sarawak mengkang dikerandauka
Isu bekaul enggau komposisi satu pertiga kerusi Sabah enggau Sarawak di Dewan Rakyat baka ke bisi dalam Sempekat Malaysia 1963 (MA63) mengkang dikerandauka,pia ku Sapit Menteri Besai Dato Sri Fadillah Yusof.
Ku iyaa, pengawa mutarka pekara nya deka begunaka timpuh dua nyentuk tiga tahun laban mesti nengah mayuh renggat ti bekaul enggau mayuh proses nyengkaum tiga komiti besai iya nya Komiti Urusetia MA63, Komiti Teknikal MA63 enggau Kaunsil Mutarka MA63.
Ku iya, komiti Teknikal MA63 ti bechairmanka iya empu deka berandauka pekara MA63 bepelasarka topik, sereta fokus ngagai isu ti nadai bekaul enggau penanggul undang-undang tauka teknikal ti balat.
“Lebuh diputuskan ba renggat teknikal, baru nya dibai ngagai Kaunsil Bejalaika Pengawa ambika dikemedar kepenudi endar, awakka dibai ke kabinet lalu pengujung iya dibai ngagai opis menteri ambika tau ngaga ubah ba semua undang-undang ke bekaul.
“Nya alai proses nya agi panjai. Kami mega mensti minta pemendar kabinet, udah nya dibai ke Parlimen, lalu Parlimen mega begunaka pemendar ari dua pertiga.
“Enti enda setuju, nya enda ulih dikemendarka” ku iya madah ngagai pengarang berita pengudah program interviu Naratif Khas Begulai Enggau Sapit Menteri Besai ba Radio Televisyen Malaysia (RTM) malam, ensana.
Fadillah ke mega Menteri Ladang enggau Komoditi madah, agih satu pertiga
kerusi Parlimen ungkup Sabah enggau Sarawak nya beguna amat ambika Semenanjung
enda ulih ngubah Konstitusyen ti dipelaba tau ngelenyauka hak dua wilayah baka ke bisi dalam MA63.
“Nama kebuah kerusi 30 peratus mesti diungkupka ngagai Sabah enggau Sarawak, (laban) enti Konstitusyen (diubah), bisi pekara ti mesti diputuska nengah dua pertiga, (lalu) enti (negeri-negeri) Semenanjung semua begempung deka nginsil hak Sabah enggau Sarawak, nya digaga ba Parlimen ti tau enda ibuh berandauka enggau Sabah sereta Sarawak, nya alai (komposisi kerusi ungkup Sabah enggau Sarawak) dipinta,” ku iya.
Kelimpah ari minta agih ba kerusi Parlimen, iya mega madahka aspek nyerahka kuasa bekaul enggau pekara pelajar enggau pengerai baka ke bisi dalam MA63 mega mengkang ba renggat dikerandauka.
Bekaul enggau slogan ‘Sarawak First’, Fadillah madahka nya digaga dikena mulaika semengat rayat Sarawak kena numbuh sereta mansang begulai enggau Malaysia, taja pan bisi didinga ‘sada nyawa’ deka mai Sarawak pansut ari Malaysia, tang ketuai Gabungan Parti Sarawak (GPS) komited agi begulai engagu menua tu.
Ngenang pasal Malaysia Madani, Fadillah madahka konsep ti dibai Menteri Besai Datuk Seri Anwar Ibrahim nya ukai semi na kena nyukat pemansang ari sukut ekonomi enggau fizikal, tang mega meri pemaik dalam konteks ‘insaniah’.
“Nya ambika (Malaysia Madani) nyadi siti budaya laban pemasnang ukai semina ari konteks fizikal aja tang bakani pemanah nya ngagai konteks ‘insaniah’,” ku iya. — Bernama