DTTAS ngepunka baru Pengawa Mandangka Pekara Pelajar siri keterubah di Betong bulan Mac 2023

Serakup Pemikir Dayak Sarawak (DTTAS) deka ngatur baru Pengawa Mandangka Pekara Pelajar siri keterubah 2023 tu di Betong dalam bulan Mac ti deka datai tu ila, ke nagit nembiak ti udah ngambi peresa SPM enggau STPM nyengkaum sida ti deka ngambi peresa perintah.

Pengawa Mandangka Pekara Pelajar tu diatur begulai enggau Layar Education Development Committee (LEDC) ti deka nempa sejarah kediri empu enggau penyereta raban rock Iban popular, Masterpiece ti nyadi sukung ngagai nembiak Dayak ke deka nampung pelajar sida.

Nengah penerang media ti dikeluarka DTTAS ditu ensana madahka tuju program endang kena meri peluang ngagai bala nembiak di menua pesisir ngulihka pemadah ti pemadu baru.

“Program tu dilangkar kenan ngenataika pemadah bekaul enggau peluang sereta bantu pelajar, latih enggau kuing ba kereja ungkup nembiak enggau ke udah tembu besekula di negeri tu,” pia ku sekretari DTTAS ke mega pemesai komunikasyen media program di Betong, Berengang Undau.

“Pengawa mandangka pekara pelajar nya ila deka fokuus ngembing sereta nyadika lalau ti beguna amat ngagai raban tu ba maya ke diatu, laban enti sida salah pilih jalai, nya deka meri penanggul ngagai pengidup sida jemah ila.

“Strategi tu beguna amat ketegal ubah pelajar enggau pinta ba kerejaya suah agi ngemeratka penyemela dalam kedua-dua pekara nya,” ku iya.

DTTAS deka ngatur program pelajar nya nengah chara nujah serata Sarawak ti fokus ngagai kandang menua pesisir.

Nengah pengawa ngiri penemu maya program tu ila,nembiak ti udah ngambi peresa SPM enggau STPM ti kurang mujur dalam akademik deka bisi peluang milih kus tauka bidang pelajar ti engkeman enggau ikas pelajar sereta minat sida.

“Kami pechaya mayuh bala nembiak ti bulih pemutus ti kurang ngemuaska ati sereta agi kakang agi ngaga pemutus sekalika deka terus nampung pelajar ngagai renggat ke tinggi agi tauka terus bekereja,” ku iya.

Nya alai, DTTAS deka nentuka program ti diatur tu ila tau nyadi lalau enggau malin ambika sida ulih ngaga pemutus ke betul sereta enda masau duit ringgit, ti ngujungka sida telengka peluang bulih kereja ke manah pengudah nembuka pelajar.

“Nya alai, kami dekaka nembiak regas ngena platform ti udah disediaka perintah ambika juluk ati DTTAS udeka ngadaka nembiak ti menyana ulih dikemujurka ba tikas ti pemadu maksimum,” ku iya

Program mega bisi kerejasama ari Yahos School of Skills sereta dipasuk 17 institusyen enggau ejensi pelajar pengelandik enggau kereja.