Asil penatai pemisi ti pemadu tinggi dalam sejarah
Ba pekara wang taun 2022 udah ngelui anggar asil 17 peratus ari RM10.2 bilion (2021) ngagai RM11.9 bilion
KUCHING:Asil penatai pemisi kebendar Sarawak ba pekara wang taun 2022 udah ngelui anggar asil sepenyampau 17 peratus ari RM10.2 bilion (2021) ngagai RM11.9 bilion lalu tu ngayanka asil ti pemadu mayuh dalam sejarah ti kala dijapai negeri tu.
Premier Sarawak,Datuk Patinggi Tan Sri Abang Johari Tun Openg madah, asil Sarawak nya nyengkaum empat kategori besai iya nya asil chukai, asil ukai chukai, diterima ukai chukai(nonrevenue receipts) enggau pemeri sereta dibayar pulai baru (reimbursement) ari perintah besai.
Iya ti nyadi Menteri Wang enggau Ekonomi Baru madahka asil chukai meri RM6.7 bilion tauka 56 peratus ari penyampau semua asil, lalu kategori bukai meri 44 peratus.
“Ari baruh kategori asil chukai, Chukai Dagang Negeri (SST) meri 84 peratus tauka RM5.6 bilion ari penyampau asil chukai ti digumpul.
“Produk bechukai ari baruh SST, entara iya nya nyengkaum produk minyak enggau gis, produk sawit enggau aluminium. Prestasi
ngumpul ti lebih manah dalam SST ketegal rega makit ti lebih tinggi dalam taun 2022 ungkup
produk minyak enggau gis sereta produk sawit.
“Tu penerang ke deka dipadahka
ngagai rayat Sarawak, iya nya asil penatai pemisi (SST) kitai nambah 65 peratus
enti dibandingka enggau empat taun ke udah.
“Tu (2022) asil penatai pemisi kitai ti pemadu tinggi dalam sejarah iya nya RM11.9 bilion,” ku iya.
Iya madahka pekara nya maya aum pengarang berita pengudah tembu aum kabinet negeri, ti diatur ba Begunan DUN Sarawak ditu, kemari.
Nandu pekara nya baru, iya madahka sebedau SST diberi kelala tauka dipejalai ba produk minyak enggau gis, kelebih agi ba taun pekara wang 2018, asil ke digumpul iya nya RM7.2 bilion.
“Nya alai, prestasi asil penatai pemisi taun pekara wang 2022 ngayanka mayuh nambah sepenyampau 65 peratus enti dibandingka enggau taun 2018,” ku iya.
Nambah nya, Abang Johari madahka perintah Sarawak deka terus mansik enggau beratika mayuh bengkah inisiatif besai dikena ngambahka asil penatai pemisi Sarawak nengah penambah, ngerembai enggau ngemayuhka jalai pemansut penatai pemisi.
Dalam taun 2022 ku iya, mayuh inisiatif udah diberi kelala tauka ditumbuhka baka neritka polisi dividen nengeri ungkup Opis Bekaul Perintah enggau Kompeni Bekaul enggau Perintah sereta bejalaika SST ba arang batu.
“Pengawa tu beguna amat dipejalaika laban perintah Sarawak terus chakah neruska agenda pemansang.
“Nambahka nya, dikena nyapai Sarawak nyadi sebuah ekonomi bepenatai pemisi tinggi lebuh manggai ba taun 2030 baka ti diperambu enggau nyata dalam Strategi Pemansang Pengudah COVID19 (PCDS) 2030,” ku iya.
Sama bisi maya aum pengarang berita nya, Sapit Premier Sarawak, Datuk Amar Douglas Uggah, Dato Sri Dr. Sim Kui Hian enggau Datuk Amar Awang Tengah Ali Hasan sereta menteri kabinet ke bukai.
“Ari baruh kategori asil chukai, Chukai Dagang Negeri (SST) meri 84 peratus tauka RM5.6 bilion ari penyampau asil ” chukai ti digumpul.