Paip ai lama meri pemar mutarka penanggul bekal ai di Sarawak
Batang paip ai ke udah lama ti meri pemar ke pemadu besai dalam maya mutarka penanggul bekal ai di Sarawak, ku Menteri Utiliti enggau Telekomunikasyen Sarawak, Datuk Julaihi Narawi.
Julaihi madahka pemar baka nya ditapi semua ejensi bekal ai ba negeri tu baka Opis Ai Kuching (KWB), Opis Bekal Ai Menua Pesisir Sarawak (JBALB), Opias Ai Sibu enggau LAKU Management Sdn Bhd.
“Alai batang paip ai mega siti agi pemar ditapi kami. Kami patut nyidi alai batang paip ambika nemu nama kebuah pantis. Siti penanggul besai ditapi ejensi bekal ai ke bukai, kelimpah ari KWB,” ku iya.
Iya madahka pekara nya maya bejadi Pengerami Malam Apresasyen KWB ba Palan Konvensyen Borneo Kuching (BCCK) ditu, malam Hari Tiga tu tadi.
Julaihi madah, berindik ari pekara nya, perintah negeri merambu ambika pansik enggau ngekar silik dipejalaika kena nentuka palan riris batang paip ai ke udah bisi.
“Jangka aku diatu nadai organisasyen ti nyengenda ngeriris batang paip ai. Paip tau diengkah ari baruh jalai tauka di dalam parit lalu udah datai ba maya iya pansik bekaul enggau ngiga riris batang paip kitai ke udah bisi.” ku iya.
Taja pia, Julaihi meri terima kasih ngagai semua staf KWB ti udah bebendar nyidi palan batang paip pantis kena mulaika pemanah bekal ai ngagai peranak ti tekeruga enggau lengkas.
Kelimpah ari nya, iya bebendar madah KWB patut ngiga jalai pemansut ai bukai laban ejensi nya mega mekal ai ngagai luar Kuching baka ke Serian enggau Samarahan nengah paip ai ke JBALB.
Langgur penemu udah diperambu kena ngaga loji meresi ai baru di Landeh ungkup KWB.
Kelimpah ari nya, Julaihi madahka pelin besai bekaul enggau bekal ai negeri nyauka deka tembu lalu perintah negeri kitai benung mansik chara bejalaika langgur penemu ti dirintaika dalam pelin besai nya.
Bekaul enggau ngempung
empat buah ejensi bekal ai ke udah lama dilanggur nyadi siti entiti, iya besemaya madahka perintah negeri deka nyaga pengelantang pendiau 4,000 iku staf ba ejensi nya nengah sesi sama enggau mutar ti diatur belama.
Sebengkah komiti pemandu baru ti bechairmanka Julaihi mega udah ditumbuhka kena nentuka pengelanchar pengawa ngempung empat ejensi nyadi siti entiti dalam timpuh dua taun.
Sama bisi diatur maya pengerami tu, iya nya nyuaka gela servis nyulut ngagai 47 staf, sereta nyuaka setipikit servis pemadu lama gawa ngagai 32 staf ke bukai.
Sama bisi ngulu pengerami nya, Sapit Menteri Utiliti enggau Telekomunikasyen, Datuk Dr Abdul Rahman Junaidi enggau Menijar Besai KWB Rodziah Mohamad.