Pemansang ti sistematik deka meri pengelantang ungkup peranak di Batu Kawa
KUCHING: Kandang endur ba Batu Kawa deka chakah dikemansang ngena chara sistematik tauka bisi atur ti meri pengelantang pendiau ngagai peranak ke diau ba endur tu.
Sapit Premier Sarawak, Dato Sri Dr. Sim Kui Hian madah pemansang infrastruktur sereta pengawa berumah deka diangkatka sereta dikemansangka agi ba kandang endur Batu Kawa.
Berindik ari pekara nya, Kaban Kunsil Nengeri (ADUN) Batu Kawa tu minta peranak ke diau ba kandang endur tu terus beserakup enggau meri kerejasama dikena nentuka pemansang dipejalaika enggau lanchar.
“Aku beterima kasih ngagai semua peranak ke diau ba Batu Kawa laban ti ulih meretika sereta sama besaup tauka bekerejasama ngemansangka Batu Kawa.
“Batu Kawa pengudah betaun-taun, kitai begunaka mayuh pemansang sereta nya kebuah kitai gawa bebendar ngena chara sistematik tauka bisi atur. Sebedau tu orang enggai datai ke Batu Kawa ketegal jauh, diatu jalai ba Batu Kawa udah sekut.
“Bakani kitai ulih ngemansangka
Batu Kawa ngena chara sistematik iya nya ketegal ari penyekut jalai alun, kami mega udah meri penemu ngambika ngaga jematan kedua (ba Batu Kawa – Kampung Rantau Panjang) lalu tu jalai baru dikena nentuka ulih mechahka jalai (dilencongkan), enggau semua jalai tu agi ba Batu Kawa,” ku iya dulu ari
nya bisi nyebut jematan nya dalam langkar sida injinia.
Dr. Sim ngenang pekara nya lebuh dikerandau raban pengarang berita nyerumba pengerami Rumah Tebuka Taun Baru China 2023 SUPP Batu Kawa ke diatur ba Dewan SJK (C) Chung Hua Batu Kawa ditu, kemari.
Bejaku baru iya madahka chunto pemansang ke deka
dikemansang ba Batu Kawa, ku iya, nyengkaum ngemansangka Kuari Ang Cheng Ho, sereta tu ulih meransang aktiviti enggau penumbuh ti ukai semina Batu Kawa tang nyengkaum Kuching.
“Kuari Ang Cheng Ho tu deka ulih nyadi landmark/ mercu tanda Batu Kawa,” ku iya nyenbut chunto bukai kena ngemansangka kandang
menua Batu Kawa.
Nitih ku iya, ba (DUN) Batu Kawa bisi urung 50,000 pintu ruang bilik sereta ari penyampau nya dianggar urung 30,000 lebih pengundi.
Iya meransang semua peranak ke diau ba Batu Kawa nyengkaum ke ukai pengundi ba DUN nya ngambika sama bejalaika tanggung pengawa
ngemansangka kandang endur nya, nyaga pengelikun enggau ke bukai.
“Kerejasama ari semua orang nyengkaum Majlis Perbandaran Padawan, SUPP sereta ke bukai kelimpah ari raban bansa udah meri pengelebih enggau jampat agi ngemansangka Batu Kawa.
“Nya alai sapa ke bedau
meli rumah patut meli rumah ba Batu Kawa (laban mayuh pemansang deka dipejalaika. Sapa ke bisi rumah ba Batu Kawa anang nyual rumah nya,” ku iya.
Bekaul enggau Rumah Tebuka Tahun Baru China 2023 nya, pengerami nya digulu pupu bansa, ti nyengkaum bala pemesai, ketuai raban bansa enggau ke bukai.