Pelajar nyadi terabai, ilang raban nembiak ba dunya teknologi

KUCHING: Pelajar iya nya siti pekara ti endang beguna dikena nyadika terabai enggau ilang ngagai bala nembiak betapi enggau pemar dunya kemaya hari ti randaka modal mensia ke regas sereta ulih besemekih ba renggat antarabansa.

Ngulihka penemu mega endang tanggungpengawa tetiap komuniti enda ngira umur. Penyulut dalam pelajar ukai semina ba ikas renggat sekula aja tang beguna nyentuk ke jemah ila, pia ku jaku lalau ari Pemesai Pelejar Pelilih Menua Sri Aman Tuan Haji Abdul Rahman Bin Haji Muhyiddin.

“Program baka ‘Anugerah Pelajar Cemerlang’ tu iya nya siti ari peransang enggau motivasyen ngagai nembiak ngambika terus nyulut dalam semua bidang.

“Aku mega ngarapka ngagai nembiak ti udah nyulut dalam bidang ti bekaul enda semina naka di sekula aja. Anang nyadika penyulut ditu ngasuh kitai terunda-runda ti ulih ngeruga pemujur kitai jemah ila. Teruska nempa penyulut dalam bidang ti bekaul lalu enda semina puas ati ba tikas tu aja, laban kita deka betapi enggau mayuh agi pemar baru dalam pejalai ngulihka penemu, neresa dunya ti endang majak mansang enggau teknologi baru ti begunaka semekih dalam inovasyen sereta bebendar nyapai ba garis penyulut,” ku iya lebuh ti bejaku bejadi pengerami ‘Anugerah Pelajar Cemerlang’ Sekula Sekondari (SMK) Melugu Sesi 2022/2023, bedau lama ti udah.

Kelipah ari nya mega, iya ngelalau ngagai bala nembiak ti enda mujur nerima perais ba pengerami tu ngambika enda putus pengarap lalu bebendar sereta komited dalam ngulihka penyulut ti dijuluk ati.

“Tau ingat pesan aku tu, deka nyadi siku nembiak tauka mensia ti mujur enggau nyulut, kita patut ngembuan ulah ti rajin sereta enda jampat putus pengarap.

“Bepegai mih ngagai jaku sempama ketup lelabi mati (tauka ‘Alang-alang menyeluk pekasam, biar sampai ke pangkal lengan’), sida ti mujur nerima gelar tauka basa sehari tu iya nya ti udah bebendar sereta konsisten dalam bidang ti dikaul sida,” ku iya nambah.

Dulu agi ari nya, ba jaku pengelalau Prinsipal SMK Melugu Beritin Empawi madahka nempa penyulut nembiak sereta kelebih agi sekula iya nya setipak enggau transformasyen sistem pelajar menua ari baruh Pelin Pemansang Pelajar Malaysia 2013-2015.

“Endang udah nyadi tanggungpengawa aku nentuka Pelin Pemansang Pelajar Malaysia ke nyadi juluk Opis Menteri Pelajar Malaysia ( KPM) ulih nyungkak ngagai pemanah ulah nembiak di SMK Melugu,” ku iya.

Bekaul enggau pengerami tu, Angela anak Rikie udah nerima ‘Anugerah Khas Akademik’.

‘Anugerah Khas Kokurikulum’ ungkup kategori lelaki dipenggi Dumixter Buyong anak Sap, lalu Juliana Misell anak Franky kategori orang indu. Kelimpah ari nya mega Juliana udah bulih ‘Anugerah Khas Pengetua.

Beserimbai enggau pengerami tu, bisi lapan iku nembiak udah nerima insentif penyulut Sijil Pelajaran Malaysia (SPM) Taun 2021.

Entara ti bisi datai ba penerami tu iya nya Pemesai Kaul Sekula Indu Opis Pelilih Menua (IPD) Sri Aman ASP Tajim anak Risit, Chairman Gerempung Apai Indai enggau Pengajar (PIBG) Rikir anak Sumpit, Penulung Kanan Administrasyen SMK Melugu Nelson Lunyat Kerosin, Penulung Kanan Pekara Bekaul Nembiak (HEM) SMK Melugu Gilbert Layang Edward, bala pengajar enggau apai indai.

Urung 246 iku nembiak SMK Melugu mega udah datai ngulu pengerami tu ti sama mega nerima perais ngagai penyulut dalam bidang ke disereta sida.

TERIMA MIH: Abdul Rahman (tiga kiba) nerima tepa ari Beritin seraya dikemata temuai dipebasa ke bukai, (ari kiba) Tajim Risit, Nelson Lunyat, Rickie Sumpit enggau Gilbert Layang ba pengerami ‘Anugerah Pelajar Cemerlang’ SMK Melugu ti diatur bedau lama ti udah.

MERI PERANSANG: Bala apai indai ti sama datai meri peransang sereta sukung ngagai bala anak ti nerima perasi ba pengerami tu bedau lama ti udah.

TERUS NGULIHKA PENEMU, ANANG PUTUS PENGARAP: Abdul Rahman lebuh ti meri jaku lalau minta raban nembiak enda leju ngulihka penemu dikena napi pemansang teknologi sereta pemujur jemah ila.

TERUS MUjUR: Juliana Misell (empat kiba) mujur bulih gelar ‘Anugerah Khas Kokurikulum’ (kategori orang indu) enggau ‘Anugerah Khas Pengetua’ begambar enggau apai indai pengudah nerima perais maya pengerami tu.

NYULUT KOKURIKULUM: Dumixter Buyong (empat kiba) bulih gelar‘Anugerah Khas Kokurikulum’ungkup kategori lelaki.

NYULUTAKADEMIK:AngelaRickie(tigakanan)andalatibegulaienggauapaiindaipengudahnerima gelar ‘Anugerah Khas Akademik’, sama dipeda (ari kiba) Tajim, Beritin sereta Abdul Rahman.

BEJADI: Abdul Rahman (dua kiba) malu tawak kelai bejadi‘Anugerah Pelajar Cemerlang’SMK Melugu Sesi 2022/2023. Sama bisi dipeda Beritin (kiba), Rickie (dua kanan) enggau Nelson (kanan).

JAKU PENGELALU: Beritin Empawi lebuh ti meri jaku pengelalu maya pengerami ‘Anugerah Pelajar Cemerlang’ SMK Melugu bedau lama ti udah.