Jalai ladang, infrastuktur betanam betupi majak dikemansangka
Jalai ladang komponen beguna dalam infrastruktur betanam betupi kena nentuka ladang kelebih agi di menua pesisir ulih disambung ngagai makit.
Menteri Industri Pemakai, Komoditi enggau Pemansang Wilayah,Dato Sri Dr. Stephen Rundi Utom madah, Opis Betanam Betupi Sarawak (JPS) bulih ungkup belanja ari perintah besai enggau negeri dikena ngaga enggau ngemanahka agi jalai ladang ba semua bagi semua.
Ku iya, dalam timpuh tiga taun ke udah (2020 – 2022), bisi 317 projek sepemanjai 272 kilometer enggau ungkus belanja sepenyampau RM45 juta, udah tembu ti meri penguntung ngagai urung 7,000 orang betanam.
“Ba taun 2023, Opis Betanam Betupi deka terus nambahka pemanah jalai penyambung (connectivity) di Sarawak. Enggau ungkup belanja ti dikemendar sepenyampau RM10 juta ari perintah Sarawak, RM1 juta ari perintah besai enggau RM4.5 juta agi ari baruh MARRIS, Opis Betanam Betupi Sarawak deka ngaga 74 projek jalai ladang sepemanjai 55 kilometer ti meri penguntung ngagai urung 1,200 orang betanam.
“Opis Parit enggau Entali Ai Sarawak ba taun 2023 udah nerima ungkup belanja RM42.2 juta dikena ngaga 200 projek MARRIS ba 83 skim parit enggau entail ai ba serata Sarawak. Semua projek ba mayuh renggat digaga,” ku iya lebuh nyimpul jurai Opis Menteri Industri Pemakai, Komoditi enggau Pemansang Wilayah (MFICORD) maya aum DUN ti diatur ba Kompleks DUN Sarawak ditu,ensanus.
Bejaku baru, iya madahka JPS benung chakah ngaga mayuh bengkah projek infrastruktur ladang ti dipelanja perintah besai nyengkaum Jalai Ladang Pekebun Mit (JLPK), Program Jalai Menua
Pesisir, Program Jematan Menua Pesisir, Jalai Penyambung Desa -Jalai Ladang Pertanian (JPD -JLP), Projek Ameniti Sosial (PAMS) enggau Program Ameniti Sosial (BANJIR).
Bejaku baru, iya madahka perintah Sarawak ngaku pemar ditapi raban orang betanam enggau pengeluar mai asil sida ke makit.
Berindik ari pekara nya ku iya, M-FICORD meri kelala siti inisiatif ti numbuhka infrastrutkur enggau perengkaguna makit di serata Sarawak.
“Inisiatif tu komponen ke beguna dalam rentayan nyendiaka pemakai enggau nyukung penyungkak kena nyual enggau chakah asil betanam betupi.
“Nyentuk ke diatu, MFICORD udah ngena dua konsep infrastruktur enggau perengkaguna makit iya nya Palan Ngumpul, Memproses enggau Mungkus (CPPC) enggau Terminal Agropemakai.
“CPPC dipejalaika satu pengendali, ti nyadi kompeni besai ti ngembuan kapasiti enggau akses makit, lalu Terminal Agropemakai tauka ‘Pasar Borong’ digaga nyadi pelasar pemungka ti mayuh penyuwa kena ngumpul, naruh enggau nyadung asil betanam betupi ba kandang menua nya,” ku iya.
Nitihku iya, M-FICORD udah nembuka pengawa ngaga tiga CPPC iya nya di Tarat, Lawas enggau Limbang sereta siti Pasar Borong di Kota Samarahan.
“Siti agi CPPC di Layar, Betong benung digaga sereta dipelaba tembu lebuh manggai ba taun 2024. Perintah mega udah ngemendarka pengawa ngaga CPPC di Long Lama enggau Sebangan. Enam Terminal Agropemakai mega udah dikemendarka ti digaga di Semenggok,Lundu, Lachau, Bebuling, Sg Baji enggau Kapit,” ku iya.