PUSAKA udah ngelangkar pelin pemansang industri bepelasarka buluh di Sarawak

KUCHING: Opis Pemansang Industri Kayu Ramu Sarawak (PUSAKA) udah ngelangkar pelin pemansang industri bepelasarka buluh di Sarawak enggau Palan Nerenak Buluh ambika ditumbuhka ba kandang menua adap ke selatan, tengah enggau utara menua tu, pia ku Sapit Premier Sarawak, Datuk Amar Awang Tengah Ali Hasan.

“Tuju nya kena nyendiaka guna paung dikena ngemansangka abis nadai urung 10,000 hektar ladang buluh di Sarawak lebuh manggai ba taun 2030.

“Entara industri bepelasarka buluh ti udah ditemu iya nya industri biochar (melange biochsr), kereban rumah, basikal buluh, farmaseutikal, kosmetik, tekstil, pemakai enggau biojisim,” ku iya ti nyadi Menteri Pengeraja Asal enggau Pemansang Mengeri.

Iya madahka munyi nya lebuh ti nyimpul jurai Opis Menteri Pengeraja Asal enggau Pemansang Mengeri maya aum Kunsil Negeri (DUN) ti diatur ba Kompleks DUN Sarawak ditu, kemari.

Nambah nya, iya madahka dikena ngemansangka modal mensia, PUSAKA mega ngatur program komuniti enggau latih pengelandik ngena buluh.

Kelimpah ari nya PUSAKA mega bisi ngatur kerejasama begulai enggau ejensi bukai ti bekaul sereta pemeranak puku menua tu enggau luar dikena ngemajuka industri buluh, ku iya.

“Ungkup industri kereban rumah, PUSAKA udah bejalaika sekeda inisiatif kena ngemajuka industri tu di Sarawak, baka langgur ngemansangka Furniture Park di Demak Laut, Kuching enggau Tanjong Manis di Mukah, program ngaga kereban rumah tauka SayD’signer Programme sereta program sama enggau ngadu begulai enggau pemeranak puku menua tu enggau ari menua luar ti udah temu bisi ati deka beranakka puku dalam industri tu,” ku iya.