Asil eksport produk kayu ramu Sarawak nurun 28% suku keterubah taun 2023
Asil eksport produk kayu ramu Sarawak bisi nurun 28 peratus dalam tiga bulan keterubah taun 2023 enti dibandingka enggau timpuh ti sama ba taun 2022.
Sapit Premier Sarawak ti mega Menteri Pengeraja Asal enggau Pemansang Mengeri, Datuk Amar Awang Tengah Ali Hasan madahka asil industri kayu ramu Sarawak ba taun 2022 ngayanka asil eksport bisi nambah sepenyampau dua peratus ngagai RM3.95 bilion enti dibandingka enggau RM3.88 bilion ba taun 2021.
“Ba suku keterubah taun 2023, asil eksport produk kayu ramu bisi nurun 28 peratus ngagai RM752 juta enti dibandingka RM1.04 bilion ba timpuh ti sama taun 2022.
“Penyampau eksport tu nurun ketegal menua Jepun enggau India ti ngurangka import taproduk besai baka papan lapis, lumpung kayu enggau papan fiber.
“Taja pia, dalam timpuh tu mega, Jepun agi nyadi pengimport besai produk kayu ramu ti meri asil sepenyampau RM377 juta tauka 50 peratus ari penyampau semua asil eksport Sarawak,” ku iya lebuh ti nyimpul jurai ungkup Opis Menteri Pengeraja Asal enggau Pemansang Mengeri maya aum Kunsil Negeri ti diatur ba Kompleks DUN Sarawak ditu, kemari.
Bejaku baru, iya madahka makit besai ke bukai iya nya
India sepenyampau RM99 juta, menua Timur Tengah (RM80 juta), Taiwan (RM41 juta) enggau China RM37 juta.
Iya madah, ke diatu, eksport produk kayu ramu agi nyadi fokus ngagai eksport produk besai.
Berindik ari pekara nya, industri kayu ramu dipinta mai transfomesyen dalam aktiviti enggau operesyen nengah pengawa ngeluarka mayuh agi produk kayu ramu ti berega mar, ngena mayuh agi barang mata ari ladang kampung sereta buluh enggau lebih optimum.
“Pengeluar enggau pengeksport barang kayu menua tu mega mesti ulih besemekih ba makit menua tu enggau dunya ngena chara ngemeranka teknologi Industrial Revolution 4.0 (IR 4.0) ti ngemeran tauka ngena teknologi automesyen enggau digital.
‘Nya alai, raban industri patut berubah sereta komited bejalaika nyikap baru pengawa sida setipak enggau barang mata ti disedia tauka diambi ari ladang kampung,” ku iya.
Nambah nya, iya madahka dalam Strategi Pemansang Pengudah COVID-19 2030, perintah udah ngelala bagi industri enggau produk baru ke bisi potensial dimaju enggau meruan baka industri biojisim, perabot, industri bepelasarka buluh enggau engineered wood.
Ku iya, Aum Antarabansa
Kayu Injinir kena 16 ngagai 17 Mei tu tadi ti diatur Opis Pemansang Industri Kayu Ramu Sarawak (PUSAKA) mujur muka runding pengemeran industri kayu ramu enggau pemegai taruh ti bekaul pasal potensial industri enggau produk tu ba makit menua tu enggau dunya.
Pemansang industri ini dipelaba deka nyadi ‘game changer’ kena nyungkak pemanah produk sereta mayuh agi ngena barang mata ari ladang kampung, ku iya.
PUSAKA mega bisi kolaboresyen enggau kaban strategik baka Opis Kampung Sarawak, Universiti Teknologi MARA (UiTM), Forest Research Institute Malaysia (FRIM), Universiti Putra Malaysia (UPM), Universiti Malaysia Sarawak (UNIMAS) enggau ke bukai ti deka bejalaika mayuh bengkah pengawa mansik enggau ngemansang (R&D) kena nambahka pengulih ngeluarka produk ti nyungkak pemanah industri kayu ramu.
“Pengawa ti dipejalaika nya ngayanka komitmen ti nadai ngetu ari perintah ti deka nyungkak industri kayu ti meruan awakka seruran relevan sereta besemekih.
“Taja pia, industri mega patut komited nyukung enggau ngamatka aspiresyen Perintah Sarawak kena nyapai ekonomi ti meruan, nerima enggau meri basa ngagai pengawa rama sereta pemeruan rampa menua,” ku iya.