MTPMA63 kelai pengeransing perintah besai mutarka isu MA63
Perintah Sarawak gaga sereta temegah ati ngagai pengeran perintah besai ti bebendar mutarka isu Sempekat Malaysia 1963 (MA63) ti udah lama betangguh.
Premier Sarawak, Datuk Patinggi Tan Sri Abang Johari Tun Openg madahka, pengeran nya dibantaika nengah numbuhka Majlis Tindakan Pelaksanaan MA63 (MTPMA63) ti betuaika (chairman) Menteri Besai Datuk Seri Anwar Ibrahim.
“MTPMA63 disukung dua Komiti Teknikal iya nya Komiti Teknikal ti bechairmankaSapitMenteri Besai Malaysia (Datuk Seri Fadillah Yusof) enggau Jawatankuasa Penyelaras ti bechairmanka Menteri ba Opis Menteri Besai (Pekara Sabah, Sarawak enggau Pengawa Khas) Datuk Armizan Mohd Ali.
“Aum Majlis Tindakan tu ti keterubah diatur kena 20 Januari 2023 ba Kuching,” ku iya lebuh nyimpul jurai aum Kunsil Negeri (DUN) ti diatur ba Kompleks DUN Sarawak ditu, kemari.
Bejaku baru Menteri Wang enggau Ekonomi Baru tu madahka entara pemutus ti udah dipesetuju dalam aum nya pasal pengawa nyirika Sekretari Wang Negeri Sarawak nyadi pengari Perintah Sarawak dalam Lembaga Hasil Dalam Negeri (LHDN).
Entara pemutus bukai ti udah dipesetuju nyengkaum Opis Kereja Raya Sarawak enggau Opis Parit enggau Entali Ai diaku nyadi Opis Teknikal , enggau diberi kuasa bejalaika perintah besai di Sarawak enggau ungkus belanja enda lebih ari RM50 juta.
“Sama dipesetuju iya nya Semakan Peruntukan Kewangan Pemberian Khas ari baruh Perkara 112D Perlembagaan Persekutuan kena nambahka penyampau Pemberian Khas ngagai Sarawak nyentuk RM300 juta, sereta nambah nya ngadua enggau manah agi Kompleks Imigresen, Kastam, Kuarantin dan Keselamatan (ICQS) ba garis antaramenua Sarawak – Kalimantan mega dipesetuju,” ku iya.
Nambah nya iya madahka Menteri Besai udah meri pemendar tumu ungkup belanja tambah sepenyampau RM1 bilion kena ngaduka manah agi infrastruktur, nambahka pengelikun enggau enggau ngangkatka pengulih kompleks ICQS ba garis antaramenua Sarawak enggau Sabah.
“Diatu kitai nempa kerejasama rat enggau perintah besai kena bejalaika projek nya,” ku iya ti mega Menteri Kuasa enggau Pemeruan Rampa Menua.