Perintah besai patut bebasaka hak Sarawak bejalaika MA63
Perintah besai dikearap bebasaka hak konstitusyen Sarawak bekaul enggau bejalaika Sempekat Malaysia 1963 (MA63) ti dimanifestasi dalam penumbuh Majlis Tindakan Pelaksanaan Perjanjian Malaysia 1963 (MTPMA63) iya nya nengah chara semua pekara ti udah dipesetuju ulih dipejalaika enggau lengkas.
Sapit Premier Sarawak ti mega Menteri Dagang Antarabansa, Industri enggau
Pemeranak Puku Sarawak, Datuk Amar Awang Tengah Ali Hasan madahka, sempekat nya udah dipesetuju ba taun 1963, sereta ukai kemari.
“Berindik ari pekara nya, aku deka nyebut baru nama ti udah disebut Menteri Besai maya bejaku ba Konvensyen Perintah Besai apin lama, pasal isu bekaul enggau MA63, Yang Amat Berhormat Menteri Besai madahka:“…ti pemadu beguna bala ketuai ke diatu iya nya ngamatka semaya ti udah digaga ‘bapa pengasas negara’ pengudah merdeka.”
“Nya alai, MA63 nya asas ngagai penumbuh menua kitai, sereta, nadai Malaysia enti nadai MA63. Nya kebuah amat beguna Perintah Besai bebasa enggau memenuhi hak konstitusyen Sarawak, ti nyadi bakih kunsi ti sama dalam numbuhka perintah besai(persekutuan) enggau ikhlas.
“Enggau tu, kami deka nenruska agenda tu pasal MA63 baka ti ditulis dalam konstitusyen Persekutuan, MA63, Ripot IGC, Konstitusyen Negeri Sarawak enggau Undang-undang Negeri,” ku iya.
Iya ngenang pekara tu lebuh nyimpul jurai Opis Menteri Dagang Antarabansa, Industri enggau Pemeranak Puku Sarawak maya baum Kunsil Negeri (DUN) ti diatur ba Kompleks DUN Sarawak ditu, kemari.
Bejaku baru iya madahka udah datai ba maya ti patut perintah besai ngenatika desentralisesyen, ukai ‘centralisation’.
Ngaku Opis Kereja Raya (JKR) Sarawak enggau Opis Parit enggau Entali Ai (JPS) nyadi opis teknikal ari baruh Arahan Perbendaharaan 182 endang patut dipuji ku iya.
Kebuah pia, ku iya, laban diatu Perintah Sarawak bisi kuasa bejalaika projek perintah besai di Sabah enggau
Sarawak , ti beungkus enda lebih ari RM50 juta.
Iya madahka nya manifestisyen terang iya nya desentralisesyen siti chara ti betul enggau kebendar begunaka ngagai perintah Sarawak diberi lebih autonomi awakka ulih meri tauka ngenataika servis ngagai rayat ngena chara ti pemadu bisi impak.
“Kami deka terus bebendar ngambi lebih mayuh projek perintah besai dikemendarka ungkup Sarawak enggau belanja terus diberi ngagai Negeri.
“Lalu nama ti dikearapka kitai mega isu desentralisesyen tauka ngenegapka perintah Sarawak pasal pelajar enggau pengerai deka addressed/ditangani perintah besai kena nambah enggau ngemanahka agi servis pelajar enggau pengerai di Sarawak, ke penguntung enggau pengelantang pendiau rayat Sarawak,” ku iya.