Program Serumpu Makai Lemai Gawai Dayak Renggat Negeri diatur 7 Jun
Program nya deka digulu Menteri Besai Malaysia enggau bini iya, sereta Premier Sarawak, bini iya
Malam nya deka bisi pemerindang khas enggau main asal ari mayuh bengkah raban bansa. Laban tuai pengatur taun tu bansa kitai Iban,komponen adat enggau main asal endang tebal agi ari raban bansa Iban begulai enggau Yayasan Kebudayaan Dayak enggau Kaunsil Seni Sarawak.
KUCHING: Program Serumpu Makai Lemai Gawai Dayak pengerami Gawai Dayak Renggat Negeri 2023 deka diatur kena 7 Jun 2023 ba Palan Konvensyen Borneo Kuching (BCCK).
Sapit Premier Sarawak ti mega Chairman Komiti Besai Pengerami Gawai Dayak 2023, Datuk Amar Douglas Uggah Embas madahka program nya deka digulu pengabang ti pemadu dipebasaka, iya nya Menteri Besai Malaysia enggau bini iya, sereta Premier Sarawak enggau bini iya.
“Malam nya deka bisi pemerindang khas enggau main asal ari mayuh bengkah raban bansa. Laban tuai pengatur taun tu bansa kitai Iban,komponen adat enggau main asal endang tebal agi ari raban bansa Iban begulai enggau Yayasan Kebudayaan Dayak enggau Kaunsil Seni Sarawak.
“Bisi mega pengawa mandangka Beauty Queen Parade ti mungkur pemenang pekit Kumang, Dayong Sangon enggau Keligit ti diatur ba mayuh bengkah bagi menua. Empat iku pengari udah dipilih ari tiap komuniti. Sida tu mandangka penyelai enggau pemayuh ngepan asal ari raban etnik ti bebida.
“Nyempulang bala indu bajik tu deka bisi enam iku bujang berani sama enggau ngulu pengawa bejalai bebala mayuh tu. Dua iku ari tetiap komuniti ti menang Keling Gawai, Dari Pagon enggau Belawan 2023” ku iya.
Iya madahka pekara nya maya aum pengarang berita pengerami Gawai Dayak Renggat Negeri 2023 ngena
tema “Segulai Sejalai” ti diatur ba BCCK ditu, kemari.
Nambah nya, program besai ke deka diatur mega iya nya “Niti Daun “Gawai 2023 ti diatur ba kandang Begunan Tun Jugah sereta tembu ba Waterfront Kuching, ti sepenyauh 1.2 kilometer (Jematan Darul Hana).Niti Daun ditetapka diatur kena 17 Jun 2023 ti dipelaba deka dipenyadi Premier Sarawak, Datuk Patinggi Tan Sri Abang Johari Tun Openg.
“Komiti pengatur melaba penyereta lebih ari 80 kontinjen, ti mungkur urung 2,500 iku penyereta. Kontinjen tu nyengkaum ari gerempung ukai dikuasa perintah, gerempung main asal Dayak, ketuai raban bansa, raban soldadu enggau ke bukai.
“Semua bansa sama dikelalu enggau ba program Niti Daun sereta ngena ngepan asal. Pemadu beguna, patut
ngerejister diri ba komiti,” ku iya seraya madah program Niti Daun nya bechairmanka Datuk John Sikie Tayai.
Program ketiga ti diatur maya Pengerami Gawai Dayak 2023 Renggat Negeri iya nya Bazar Gawai Dayak 2023, ti diatur berengkah 16 ngagai 25 Jun 2023 ba Tengah Laman Dewan Mensia Mayuh Majlis Bandaraya Kuching Selatan (MBKS).
Nitihku iya, bazar ti dibuka pukul 5 lemai maya hari gawa enggau pukul 11 pagi maya ujung minggu sereta ditetapka ditutup pukul 11 malam tiap hari.
“Komiti pengatur naga 200 iti bansal alai bejual nyengkaum 100 bansal alai bejual enda halal, 50 bansal alai bejual pemakai halal, 30 bansal alai nyual kraf pengelandik jari enggau 20 bansal alai bejual ke bukai.
“Bazar Gawai tu deka
dipenyadi kena 18 Jun 2023,” ku iya seraya madahka pengawa mandangka seni budaya Dayak, pemerindang ari bala artis mega bisi diatur ba bazar tu.
Bekaul enggau tema Gawai Dayak 2023, Uggah madahka tema Segulai Sejalai mandangka pengatur pengerami beratka pemesai guna penyerakup ba pupu bansa di Sarawak.
Nengah penyerakup kitai ulih ngamatka pengeran menua ti deka gerai tauka likun ari empas pandemik COVID-19.
Berebak enggau tu, Uggah ngarika raban bansa Dayak meri terima kasih ngagai perintah Negeri Sarawak ti ngagihka belanja ngagai komiti pengatur kena ngemujurka pengerami nya, kelimpah ari nerima pemeri ari Opis Menteri Dagang Temuai, Seni enggau Budaya Malaysia
(MOTAC) enggau Opis Menteri Dagang Temuai, Industri Kreatif enggau Seni Pemerindang (MTCP) Sarawak, sereta terima kasih ngagai ejensi enggau opis perintah, gerempung ukai dikuasa perintah (NGO) ti udah meri penemu, udah besaup gawa ngemujurka program nya.
Sama bisi maya aum pengarang berita nya kemari, Menteri ba Opis Premier Sarawak ti nyadi Chairman Komiti Kereja Pengerami Gawai Dayak 2023, Datuk John Sikie Tayai, Sapit Menteri Pengerai Mensia Mayuh enggau Pengawa Berumah, Datuk Dr. Penguang Manggil enggau sida ke bukai.