Deka bisi siti agi jalai pemansut kena nambahka penatai pemisi Sarawak

KUCHING: Premier Sarawak Datuk Patinggi Tan Sri Abang Johari Tun Openg madahka engka deka bisi siti agi jalai pemansut penatai pemisi baru, lalu iya arap amat ati nya ulih nambahka agi penatai pemisi Sarawak.

Berjaku ba pengerami makai lemai Kelab Penyukung Gabungan Parti Sarawak (GPS) ti diatur ba sebuah hotel ditu malam ensanus, Abang Johari madahka iya deka mantaika pekara nya enda lama agi.

“Sebedau tu, kitai udah nyerungkai sereta ngerembaika jalai penatai pemisi nengah dagang karbon lalu ke pemadu baru, lumut ai. Bisi agi jalai pemansut penatai pemisi baru dalam runding aku diatu ti tau kena nambahka agi jalai penatai pemisi Sarawak.

“Uji perundingka makit ke bisi diatu lalu kitai ulih ngasilka jalai penatai pemisi kitai diatu sereta nyungkak pemanah nya ngagai teknologi sereta ngemajuka agi negari kitai,” ku iya.

Abang Johari mega Menteri Wang enggau Ekonomi Baru madah, ungkup suku keterubah taun 2023, Sarawak ngerikodka penatai pemisi lebih RM5 bilion lalu Sarawak dipelabaka nerima lebih RM11 bilion asil taun tu.

Enggau gaya penuduk wang ti tegap, iya pechaya aspirasyen pemansang negeri ulih dikemujurka nyengkaum nyendiaka pelajar tinggi enda bebayar ngagai rayat Sarawak sebedau taun 2030.

“Gaya negeri Sarawak jemah ila manah amat, nya alai tagit aku sebedau taun 2030, kami deka meri pelajar tinggi enda nenayar ngagai anak-anak Sarawak.

“Aku ngarapka nengah asil tu, kitai nitihka menua Jerman enggau menua Scandinavia, sida beratka pelajar, reti nya pemansang bakat. Enti nuan udah bisi pengelandik nya, baru kitai nemu jalai pemansut kitai empu,” ku iya.

Abang Johari mega ngelalau rayat Sarawak ambika majak ngintu penyerakup.

“Jaga mih penyerakup kitai lalu lakka GPS nyadi terabai Sarawak,” ku iya.

Sama bisi ngulu pengerami nya, dua iku sapit Premier Datuk Amar Douglas Uggah Embas enggau Dato Sri Dr Sim Kui Hian, Speaker DUN Tan Sri Datuk Amar Mohamad Asfia Awang Nassar, Ketuai Whip GPS Datuk Ibrahim Baki enggau menteri kabinet, sapit menteri enggau Kaban Kunsil Negeri GPS.

— Gambar Roystein Emmor TEPA: Abang Johari (tiga kanan) nerima tepa ari Lo Khere Chiang kelai meri terima kasih, beserimbai enggau pengerami makai lemai Kelab Penyukung GPS malam ensanus. Sama bisi dipeda dia, Dr Sim (dua kiba), Uggah (dua kanan), Asfia (kanan) enggau Ibrahim (kiba).