Slogan ‘Agi Idup Agi Ngelaban’ nyadi pengangkat semengat ngagai bala bujang berani Iban Trackers
Slogan ‘Agi Idup Agi Ngelaban’ nyadi pengangkat semengat ngagai bala bujang berani Iban Trackers ti mujur ngempung mensia mayuh dalam penyerakup enggau madani mensia mayuh diatu.
Pia ku Presiden Serakup Veteran Soldadu Kor Renjer Leftenan Kolonel (B) Mohd Melintang Abdullah madah ngagai pengarang berita lebuh ke dirandau maya ‘Bicara Sejarah: Iban Trackers’ beserimbai enggau Ngintu Minggu Penyerakup 2023.
“Iban Trackers ke mega dikelala enggau nama Sarawak Rangers maya menua keterubah siga, bisi 42 unit gerempung soldadu British udah berebut deka mai sida tu enggau gerempung nya.
“Antara nya, British Batalion, Gurkha Batalion enggau New Zealand Batalion laban Sarawak Rangers kebendar iya udah bisi chap kediri empu ti udah ditumbuhka di Sarawak,” ku iya madah ngagai pengarang berita ditu,Hari Minggu nyin tadi.
Pengudah numbuhka Malaysia kena 16 September 1963, Sarawak Rangers ditukar nama ngagai Malaysian Rangers.
Udah nya Batalion 1 Renjer (ti dipasuk orang Sarawak) lalu 2 Renjer (dipasuk orang Sabah) ditumbuhka ti lalu dikerembaika ngagai 11 Batalion.
Ku Melintang, bujang berani kelia bisi penyemaka, landik nyidi munsuh, berani sereta talukka ketuai.
Ukai nya aja, pemujur Sarawak Rangers maya menua siga, kelebih agi di Malaya
lebuh sida bejalaika pengawa kurang amat bakal tauka bulih pemedis.
“Nitihka rikod, semina 25 ba 12 taun (menua siga keterubah, semina 20 iku aja bebadi nyawa).
“Fakta ti ngasuh bakal enggau pemati mimit nyadi ba raban elit ari Sarawak tu, siti ari nya pengelandik sida dalam bidang kampung enggau nyidi endur munsuh
sereta pemindah sida.
“Sida mega landik ngidupka diri dalam kampung taja pan nadai bekal pemakai, kelimpah ari berani, talukka orang ti nyadi ketuai enda ngira ketuai nya bansa Iban, Melayu tauka India, sida tetap taluk.
“Kerejasama sida mega manah amat sereta enda ngelakka bakih sida dijamah.
“Kor Renjer mega seruran ngembuan ulah ti jelan iya sereta bisi penyemaka, rurus ati taja pan sida ari mayuh pupu bansa,” ku iya madah nyemetak.
Sida mega bisi enggau maya perang ngelaban kominis dalam taun 1948 nyentuk 1960, pengelama 12 taun bisi 21 iku udah dibai pulai dalam ‘Ops Pulai’.
Bangkai sida dibai ari Semenanjung Malaysia lalu udah dikuburka ba Kubu Bujang Berani ditu.
Berebak enggau nya, Melintang mega minta raban veteran soldadu masuk barang bagi serakup ex- soldadu amb ika pengelantang pendiau sida dijaga.
Iya ngelalau raban biak ambika beratika penyerakup sereta ingatka pengawa ti udah dikereja sida ti udah lesi bebadi nyawa ngenanka menua nyentuk ke menua likun sereta teulihka pemujur diatu.
Sama bisi maya ke dirandau nya, Dekan Fakulti Sains Sosial dan Kemanusiaan, Universiti Malaysia Sarawak (UNIMAS) Profesor Dr Nielson Ilat Mersat enggau Sapit Ketuai Direktor Arkib Menua Malaysia, Mokhtaruddin Lamsin.