Muka kasino di Borneo Highland Resort patut dipeda ari sukut positif
KUCHING: Numbuhka kasino ba Borneo Highland Resort patut dipeda ari sukut positif ngagai pemansang sosio-ekonomi peranak ba kandang menua nya.
Menteri Pelajar, Inovesyen enggai Pemansang Bakat, Dauk Roland Sagah Wee Inn madahka, anang meda ari aspek judi, tang nama ti dikearapka nerima mayuh penatai orang ari luar sereta ulih alai peranak ba menua nya begiga rejeki nengah pemansang baka taman tema, chalet tauka hotel ti digaga ba endur nya.
Kaban Kunsil Negeri (ADUN) Tarat nya madahka, kelimpah ari nya nyema mayuh orang ari luar datai ngagai endur nya udah tentu deka meri pemanah ngagai peranak ba menua nya baka ulih ngelakuka asil utai tanam.
“Kebendar kitai nyukung penemu nya (numbuhka kasino ba Borneo Highland Resort), tang ukai reti iya taja pan bisi madah nya enda manah tauka mantah, pekara ti baka tu normal. Tang ketemu aku mayuh mega nyukung tu.
“Lalu aku enda nemua sekalika nyadi tauka enda bekaul enggau kasino tu. Sekalika diberi tauka enda tu bepanggai ngagai perintah, laban lisin dikeluarka perintah.
“Kitai anang meda ari aspek judi, kitai meda ngagai pemansang sosio-ekonomi ti dibai pemeranak puku nya,” ku iya.
Sagah ti nyadi penyanding penemu Gerempung Nasional Dayak Bidayuh (DBNA) ditanya pekara nya ba aum pengarang berita pengudah iya tembu bejadi Aum Besai Tiga Taun Sekali ke-10 ba Dewan DBNA ditu, kemari.
Bejaku baru madahka kebendar pengawa bejudi tusah deka ditagang, nyema kasino enda ditumbuh orang ti endang deka bejudi mega tetap bejudi baka bebelika lumur, bejudi online enggau ke bukai.
Apin lama maya baum Kunsil Negeri, Sapit
Menteri Dagang Temuai, Datuk Sebastian Ting madah perintah Sarawak nadai langgur ti lengkas deka ngepunka kasino ba Sarawak tang deka meda chara ngemansangka baru Borneo Highland Resort nyadi palan alai ngelantang ati bersepadu ti nyendiaka mayuh pematak temuai kena narit orang datai.
Iya madahka resot bersepadu nya deka disikap perengka guna baka padang golf, hab pengerai, dewan, palan pemerindang enggau mayuh macham kedai makai enggau renchit.
“Nadai langgur deka ngaga kasino laban iya pekara dikemeratka perintah, iya iya udah tentu begunaka pansik holistic enggau betul kena ngemansangka kandang menua nya setipak enggau tiga batang tuju iya nya bekaul enggau ekonomi, sosial enggau rampa menua ti meruan baka ti digaris dalam strategi pemansang pengudah COVID-19 2030,” ku Sebastian.