Rayat Sarawak mesti begulai rat enggau perintah nengeri, ku Lee
Nentuka komuniti pupu bansa enggau jalai pengarap di nengeri tu ulih terus idup enggau lantang sereta likun
MIRI: Rayat Sarawak mesti terus begulai sereta bekerejasama enggau perintah nengeri dalam nentuka komuniti pupu bansa enggau jalai pengarap di nengeri tu ulih terus idup enggau lantang sereta likun.
Menteri Perengka Pengangkut Dato Sri Lee Kim Shin madah, ari baruh pegai Gabungan Parti Sarawak (GPS), perintah nengeri deka terus ngelaku enggau ngenegapka pengulih bejalaika budaya bansa enggau jalai pengarap di nengeri tu.
Iya madah, pengaa numbuhka UNIFOR (Unit Pekara Jalai Pengarap Bukai) kenyau ari 2017 ngayanka perintah nengeri komited dalam nyaga peglentang pendiau jalai pengarap bukai di nengeri tu kelimpah ari jalai pengarap Islam.
“Ungkup taun tu aja, perintah nengeri udah meri agih belanja sepenyampau RM100 juta ungkup UNIFOR dikena mantu ngaga tauka ngemesaika gerija, kuil enggau ke bukai, sereta mantu sekula misyen di selampur Sarawak,” ku iya lebuh ti bejadi pengawa bedagang pengasih pemakai ba tengah laman gerija Borneo Evangelical
Mission (BEM) di Jalai Airport kemari.
Lee ti mega Kaban Kunsil Nengeri (ADUN) Senadin madahka gerija di Sarawak nyengkaum BEM Jalai Airport sama udah bulih pemaik ari UNIFOR.
“Gerija tu mega ari baruh konstitusyen aku, lalu aku udah meda mayuh ubah ba begunan ti jauh besai agi,” ku iya.
Taja komuniti pupu bansa diau di Sarawak, Lee ngarapka rayat deka terus ngemeranka ulih bebasaka pangan diri .
Nitih ku iya, Sarawak enda deka ngemendarka orang ti enda bebasaka jalai pengarap orang bukai tama ke nengeri tu laban deka ngeruga penyerakup sereta pengelantang ke udah diasai rayat Sarawak.
Ba pengerami tu, Lee udah madahka agih belanja RM20,000 ari geram Projek Mit Menua Pesisir (MRP) ungkup gerija BEM dikena nambahka tabung aktiviti nya sereta ngatur program bukai.
Sama bisi iya nya Sapit Menteri Dagang Temuai, Industri Kreatif enggau Seni Pemerindang Datuk Sebastian Ting.
Ungkup taun tu aja, perintah nengeri udah meri agih belanja sepenyampau RM100 juta ungkup UNIFOR dikena mantu ngaga tauka ngemesaika gerija, kuil enggau ke bukai, sereta mantu sekula misyen di selampur Sarawak.