Lapan bansa barang dipasukka ari baruh SHMMP Gawai Dayak
SHMMP dipejalaika tiga hari sebedau hari pengerami, sehari maya pengerami enggau tiga hari pengudah pengerami: Azman
KUCHING: Bisi lapan bansa barang ke diguna dipasukka ari baruh Skim Rega Maksimum Musim Pengerami (SHMMP) beserimbai enggau Hari Gawai Dayak 2023 ke deka diintu enda lama agi.
Ketuai Sekretari Opis Menteri Dagang Dalam Negeri enggau Ungkus pengidup Datuk Azman Mohd Yusof madah, skim rega nya deka dipejalaika pengelama tujuh hari iya nya tiga hari sebedau pengerami, sehari maya pengerami enggau tiga hari pengudah pengerami.
Ku iya, beserimbai enggau Hari Gawai Dayak, skim rega nye berengkah dipejalaika kemari, 29 Mei nyentuk 4 Jun taun tu.
“Skim rega nya mungkur lapan bansa barang ke diguna baka manuk tuai idup,sayap manuk, bawang burak, kubis segala import, ubi kentang import, dagin babi idup, dagin babi (perut) enggau dagin babi (dagin enggau lemak).
“Kelimpah ari lapan bansa barang nya, bisi enam bansa barang baka manuk, telu enggau ke bukai nya udah diteritka kenyau ari 5 Februari 2022 ti mengkang dipejalaika,” ku iya.
Iya madah munyi nya maya aum media pengudah bejadi SHMMP Hari Gawai Dayak 2023 Renggat Sarawak ba supermarket Farley Batu 6 ditu,kemari.
Ku Azman, opis Farley ba Jalai Penrissen udah neritka skim rega murah ari rega ke dijaga.
“Pengudah ninjau sereta beratika rega stuk tu, Farley agi nurunka rega ari rega ke dijaga ke alai sida udah nurunka rega ke dijaga entara 10 nyentuk 20 peratus.
“Antara nya sayap manuk, enti nitihka rega maksimum
RM14.50 tang ba Farley RM13.90, kentang ke patut iya RM4.00 tang dikurangka nyadi RM2.90 lalu pia mega bawang burak ari RM8.00 ngagai RM 7.90.
“Tu pengawa enggau kerejasama opis Farley enggau perintah kena mantu mensia mayuh ti begunaka lalu rega nya deka meri penguntung ngagai penguna ti ngintu pengerami nya,” ku iya.
Berebak enggau nya, Azman madahka sida mega bisi neritka adat kena nen tuka supermarket tauka kedai nitihka rega ti udah ditetapkan dalam atur.
“Nyema ngelanggar atur, ukum tau ditinggang ke alai ungkup individu tau diukum maksimum sepenyampau RM100,000 lalu ungkup kompeni tau diukum maksimum RM500,000,” ku iya madah nyemetak.
Ku iya,nyema stuk barang ke diguna nya putus ba endur sida, penguna ngeripot ngagai
KPDN ambika ukum tau dipejalaika nyengkaum mutarka penanggul nya enggau lengkas.
“Kami mega udah berandau engagu kompeni ti mekalka barang ti diguna tu kena nentuka enda putus stuk,” ku iya.
Bekaul enggu isu natak penyampau gula ke dibeli, Azman madahka sida iya enggau pengeluar gula putih betapis meri jamin gula n ya ckup dikena dalam menua.
“Pengeluar gula meri jamin ke alai gula putih betapis kasar enggau alus mesti chukup laban 42,000 tan metrik deka dikeluarka sebulan ungkup ke dikena dalam menua,” ku iya.
Sama bisi maya nyaSapit Ketuai Direktor Penerit Adat (Operasyen) KPDN Shamsul Nizam Khalil, Direktor KPDN Sarawak Matthew Dominic Barin, Menijar Farley Kuching Wilson Moh enggau Direktor Bagi Nyaga Petroleum Zaimy Shaari.
“Skim rega nya mungkur lapan bansa barang ke diguna baka manuk tuai idup,sayap manuk, bawang burak, kubis segala import, ubi kentang import, dagin babi hdup, dagin babi (perut) enggau ” dagin babi (dagin enggau lemak). Datuk Azman Mohd Yusof