Angkatka standard mengeri ambika ulih nyadi wilayah betikas antarabansa
MIRI: Pengawa Perintah Sarawak mengangkat standard mengeri di negeri tu nengah pemansang ekonomi baru nyaup ngangkat standard Sarawak nyadi wilayah betikas antarabansa.
Premier Sarawak Datuk Patinggi Tan Sri Abang Johari Tun Openg madah, tu kuing perintah Sarawak nyadi negeri maju ba taun 2030 lalu pengawa dikereja perintah negeri tu udah mandangka asil.
Ku iya, ungkup projek mengeri besai pintar, Miri ba mua lalu nyadi chunto ke pemadu manah ari sukut ngena aplikasyen ba pengawa ngatur pengawa.
“Kelimpah ari nya, pengawa ngaga begunan bepelasarka gadung di Miri enggau singkang nyikap Miri ngena infrastruktur moden sereta perengka ti moden ngangkatka standard Miri nyadi mengeri besai antarabansa,” ku iya madah maya pengerami makai lemai nutup Mayfest ditu,malam ensanus.
Ku Abang Johari, singkang nya mega ngangkatka Sarawak nyadi wilayah nuju ekonomi gadung ti beratka nyaga rampa ngelingi enggau rampa ti gadung
Ku iya, enti Miri enggau mengeri bukai ulih diubah sechara standard antarabansa diterima, udah tentu ngangkaka Sarawak nyadi wilayah antarabansa enggau ngena ekonomi baru.
“Perintah negeri mantaika ekonomi hidrogen enggau karbon ke mega ti keterubah mantaika polisi Ngena enggau Naruh Karbon (CCUS) nyadi hak negeri tu nyengkaum ngadu enggau termasuk enggau dagang karbon.
“Pansik sentang mikro alga berengkah kenyau ari taun 2018 mega udah mandangka asil taun itu lalu pansik mikro alga tau ngasilka minyak ti meruan enggau rengka kompaun anti viral engkeman ungkup pengawa berubat,” ku iya.
Ngenang sentang ngena Bahan Api Penerbangan Lestari (SAF), iya madahka perintah negeri bekerejasama enggau Aerospace Industry Inovation Centre Of Malaysia, SEDC Energy sereta bilun Airbus ngeluarka SAF enggau chara besai.
“Kitai masuk ngagai ekonomi baru ari sukut dagang karbon sereta ngenan gadung, kebendar iya kitai amat maju dalam pekara tu,” ku iya.
Ku iya baru, pemansang nya diaku perintah besai ti lalu ngangkatka standard sereta ngubah ekonomi nengah polisi baru dibantu ari penemu pakar anak-anak Sarawak empu.
Ari sukut pelajar, Abang Johari dekaka anak-anak Sarawak ngulihka pelajar tinggi di universiti enggau kolej antarabansa ti diempu perintah negeri ti nyendiaka kus enggau disiplin ke pemadu baru bepelasarka teknologi enggau ekonomi.
“Sekula antarabansa mega digaga ba indu negeri sereta dikemansangka di Miri ungkup bala nembiak ti nyulut nyengkaum ari ruang bilik B40 enggau M40.
“Enti kitai bisi duit turu ke mayuh, kitai tau beranakka nya dalam ‘dana berdaulat’ sereta meri pelajar tinggi enda bebayar ngagai anak-anak Sarawak. Tu niat ati kitai enggau anak Sarawak belajar di universiti kitai empu lalu belanja nya dipelanja Yayasan Sarawak,” ku iya.
Ku Abang Johari, penatai pemisi ti diulih ke nambah ngemendarka perintah negeri ngaga mayuh macham perambu pemansang baru.
Dalam taun siti nyin tadi, Sarawak nerima penatai pemisi sepenyampau RM12 bilion. Ungkup suku keterubah taun tu, penatai pemisi ke diulih bisi RM5 bilion, iya nya 45 peratus ari asil ti diperambu iya nya RM11 bilion ungkup sepemanjai taun 2023.
Ngenang pasal pemansang fasa kedua Dewan Bandaraya Miri (DBM), Abang Johari madahka perintah negeri ngaga pansik pasal nya nyengkaum ungkus ngaga.
“Enti nitihka un gkus enggau daya idup, kitai ulih ngaga tang nitihka gaya, enti (projek) ulih meri simbol moden enggau simbol moden teknologi di Miri,” ku iya.
Dulu ari nya, ADUN Pujut enggau Datuk Bandar MBM Adam Yii madah, pengerami nya ngelaika nutup aktiviti ti udah diatur sepemanjai bulan Mei ti diatur beserimbai enggau pengerami ngintu taun ke-18 Miri pengudahka nyapai status mengeri besai kena 20 Mei 2005.
Pengerami nya dirichahka agi enggau mayuh macham tanda main asal bansa ditu.
Sama bisi ngulu pengerami nya, Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal Dato Sri Dr Sim Kui Hian, Menteri Pengangkut Sarawak Dato Sri Lee Kim Shin, Menteri Dagang Temuain, Industri Kreatif enggau Seni Pemerindang Dato Sri Abdul Karim Rahman Hamzah enggau bala menteri ke bukai.