Perintah Sarawak deka mantu pengarang berita nampung pelajar, ku Abang Johari
KUCHING: Perintah Sarawak sedia mantu pengarang berita ti deka nampung pelajar ngagai renggat ke tinggi agi ngena skolarship dikena nambah ikas profesionalisme sida.
Premier Sarawak Datuk Patinggi Abang Johari Tun Openg madah, bantu skolarship nya diberi nengah Yayasan Sarawak.
Aku ku iya, dekaka pengarang berita landik agi nyediaka ripot berita ti manah nengah pemereti ba mayuh bengkah bidang kelebih agi sains, pekara wang enggau bank sereta ekonomi.
“Ambika chunto ku iya, kitai dekaka pengarang berita nemu ba sains ambika bejaku pasal alga (lumut), bakani minyak penerabai ti meruan (SAF) diasilka ari alga, nama reti ‘lipid‘ laban lipid diasilka arialga. Enti endak, sida deka ngaga ripot palesu.
“Ari sukut ekonomi enggau pekara wang, kami mega dekaka pengarang berita landik ba pekara wang korporat ambika ripot (wang) nya betul. Nya ti dipadahka aku ripot ti manah.
“Nya alai en ti kita (pengarang berita) deka nampung pelajar, saku deka mantu nengah Yayasan Sarawak. Enggau nya, standard kita ulih diangkatka lalu chara ripot pengarang berita mega betul,” ku iya.
Iya bejaku munyi nya maya pengerami ‘Jamuan the’ beserimbai enggau Hari Wartawan Nasional (HAWANA) 2023 Sarawak di sebuah hotel ditu,kemari.
Berebak engagu nya, Abang Johari, Sarawak deka ngatur aum bekaul enggau pengarang berita kena nambahka profesionalisme enggau ripot pengarang berita di negeri tu.
Ku iya, aum nya mesti diatur ketegal ‘ripot ti manah’ bepanggai ba ikas standard enggau peneleba pengarang berita.
“Nya alai ba rumding akuaum ti siti chara kena kitai bekunsi idea bakani kitai ngangkatka profesion pengarang berita.
“Nengah aum tu meuga, aku ngarapka randau ti diasilka tau dikenataika ngagai perintah,”ku iya.
Bekaul enggau pengerami ngintu HAWANA, Abang Johari “memberi lampu gadung” nyema Sarawak nyadi tuai pengatur pengerami HAWANA renggat nasional taun baru.
“Enti Menteri Komunikesyen enggau Digital, Fahmi Fadzil setuju, kitai tau nyadi hos ngintu pengerami tu taun baru.Bekaul enggau penanggul belanja, kami mega tau mantu,” ku Abang Johari.
Sama bisi ngulu pengerami nya,Sapit Menteri ba Opis Premier Perintah Sarawak) Abdullah Saidol, Adun Tupong Fazzrudin Abdul Rahman enggau Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak Datuk Hii Chang Kee.