Rambai jaku ‘Segulai Sejalai’ dikena di serata Malaysia
KUCHING: Rambai jaku ti suah dikena sereta setipak amat enggau penyerakup Sarawak iya nya ‘Segulai Sejalai’ deka dikena di serata Malaysia.
Menteri Besai (PM), Datuk Seri Anwar Ibrahim madahka diri tebatak runding enggau rambai jaku nya sereta deka ngena nya nyema nemuai bejalaika pengawa ngagai semua nengeri di Malaysia kelebih agi ti bekaul enggau penyerakup sereta kerejasama.
“Ditu aku deka madah iya nya aku tebatak runding enggau ‘Segulai Sejalai’.
“Nya alai malam tu aku deka nentuka ‘Segulai Sejalai’ tu nyadi rambai jaku ti dikena di serata Malaysia.
“Reti nya, enda ngira dini alai ke dilawa aku enti bejakuka pasal penyerakup, kerejasama patut ditegapka, aku deka nyebut ‘Segulai Sejalai’,” ku iya.
Pekara nya ditetapka Anwar maya iya bejaku ba Pengerami Gawai Dayak 2023 ti diatur ba BCCK ditu, bedau lama udah.
Dulu ari nya, Anwar madahka penatai iya ngulu pengerami Gawai Dayak tu ngarika sentimen rayat Malaysia ti ngasaika Gawai sebagi ari budaya enggau basa ti lalu nyadi budaya ti amat beguna di menua Malaysia.
Iya madahka pengerami Gawai Dayak siti aspek budaya ti beguna sereta patut dikemeratka laban bisi penguntung ketegal mayuh pupu bansa enggau jalai pengarap tu.
Pemayuh pupu bansa enggau jalai pengarap ulih ngeruntuh enggau meri penegap tauka pemanah ku iya, ukai semina perintah Gabungan Parti Sarawak (GPS) tang perintah penyerakup Malaysia milih pemayuh bansa enggau jalai pengarap tu patut mai pemanah enggau penegap.
Taja pia ku iya, nya ukai sebengkah fenomena ke tau dianggap muntang laban tu ditumbuh sereta dikemeranka sida ‘Apai Kemerdekaan’ kelia ti ditempa enggau pen
garap besai.
Pengawa numbuhka Malaysia ku iya, enggau Sarawak, Sabah sereta nengeri bukai dalam Semenanjung Tanah Melayu dikena ngangkatka status menua tu nyadi menua ti bedaulat,merdeka enggau nyulut sereta ngena semua penyulut nya, nengah chara mulaika baru ngagai rayat.
“Ulah ti deka ngeruga penyerakup endang bisi, (tang) di Sarawak agi ulih dijaga, di Sarawak lebih
dalam pemaik enggau pengelantang, aku meri tabi puji enggau pengaga ati ngagai iring Premier Sarawak (Datuk Patinggai Tan Sri) Abang Johari Tun Openg.
“Nya alai ba pengerami ti kala digulu aku ditu (Sarawak), aku madah udah datai ba maya iya rayat Malaysia kelebih di Semenanjung Tanah Melayu, kelebih agi bala bakih ti bisi ‘inggar’ sereta mantaika bida ke lalu ngeruga entara bansa, mai
sentimen jalai pengarap ti enda manah enggau ekstrim, (patut) belajar ari peneleba enggau pengering tauka penegap ke bisi di Sarawak.
“Aku ngemeratka pekara tu, laban lebuh kitai ningga jaku lalau Duli Yang Maha Mulia Tuanku Yang di-Pertuan Agong sehari nya (Hari Satu – nyerumba Hari Pengada) agi ngenatika pemesai guna nempa semangat penyerakup tu, lalu anang nyadi enda ngira bagi isu dikena ngeruga enggau meri pemechi,” ku iya.
Bejaku baru, iya madahka enda ngira bagi jalai pengarap sekalika Islam, Kristian, Hindu, Buddha enggau ke bukai, semua mai pesan nuju ngagai pengelantang, rinduka diri sama diri lalu nya patut terus ditempa.
Berindik ari pekara nya, Anwar meri terima kasih ngagai perintah negeri Sarawak sereta GPS ti udah meri sukung ngagai perintah penyerakup.
“Nya alai aku ari penemu aku kediri, deka meri terima kasih ngagai Premier Sarawak enggau GPS laban ti netapka meri sukung enggau semengat ti sama.
“Tu chukup besai reti, aku enda muji lebih tang pekara tu amat nyata, taja pan GPS tu parti Sarawak, tegap di Sarawak. Penatai (GPS) nempa penyerakup ba perintah penyerakup ti meri pengering ngagai perintah Malaysia,” ku iya.
Dulu ari nya Sapit Premier Sarawak, Datuk Amar Douglas Uggah dalam jaku pengelalu iya madahka Gawai Dayak maya komuniti tu meri terima kasih ngagai Petara ketegal ti udah teulihka asil ti manah sereta mansang ti diasaika rayat kelebih agi komuniti Dayak.
Ku iya, komuniti Dayak meri terima kasih ngagai perintah Gabungan Parti Sarawak (GPS) enggau perintah penyerakup ngagai semua sukung ti udah diberi ngagai komuniti ba taun nyin kemari.
“Mayuh ti udah dikereja tang kitai agi begunaka mayuh agi sukung dikena nentuka komuniti kitai sebaka enggau rayat Malaysia ke bukai.
“Lalu, rambai jaku Gawai taun tu iya nya ‘Segulai Sejalai’. Tu isi komitmen kami kena ngetanka penyerakup, pengelantang enggau pemaik ti endang udah bisi ba rayat Sarawak taja pan mayuh bagi etnik, asal, budaya enggau jalai pengarap.
“Di Sarawak kami nerima, meri terima kasih, ngerami enggau bebasaka bida entara kitai,” ku iya.
Sama bisi ngulu pengerami tu, Sapit Menteri Besai (TPM) Datuk Seri Fadillah Yusof, Premier Sarawak, Datuk Patinggi Tan Sri Abang Johari Tun Openg, Sapit Premier Sarawak, Datuk Amar Douglas Uggah Embas enggau Dato Sri Dr Sim Kui Hian sereta bala pemesai ke bukai.