Pengerami apresiasyen pelajar dikena nyungkak sereta meransang penyulut nembiak di sekula
SARIKEI: Pengawa ngatur pengerami nyuaka setipikit enggau penyulut iya nya platform ti nyungkak bala nembiak dalam ngenegapka tikas penyulut sida dalam bidang akademik sereta mega bidang kokurikulum.
Penulung Pemesai Pelajar Opis Pelajar PElilih Menua (PPD) Sektor Perancangan PPD Sarikei Mattheus Akun Balang madah, gelar ti diberika maya pengerami tu iya nya kelai meri basa ari sekula ngagai bala nembiak ti mujur ngangkatka tikas potensial diri lalu ngayanka tikas penyulut ti manah dalam pelajar.
“Tikas penyulut ke diayanka tu udah tentu nyadika chunto lalu deka dititihka bala nembiak bukai dalam ngangkatka tikas pemujur akademik enggau kokurikulum sida jemah ila.
“Meri besai pengaga ati ngagai semua raban sekula iya nya raban administrasyen, pengajar, bala nembiak enggau mega staf sukung ti dibantaika dalam ngemujurka nembiak sekalika dalam bidang akademik, bidang kokurikulum, pemanah ulah enggau runding nembiak.
“Teruska mih penyulut tu lalu semua pemujur tu enda
patut ngelimpangka runding kitai,” ku Mattheus.
Iya madah munyi tu lebuh Majlis Apresiasi Kecemerlangan Tahun 2023 Sekula Sekondari (SMK) Bandar Sarikei, bedau lama ti udah.
Nitih ku Mattheus, pelajar kemaya hari tu bisi mayuh penguji lalu tu patut ditapi enggau manah ari bala pengajar enggau mega
nembiak.
“Taja kitai udah bisi penyulut enggau pemujur, tang tu ukai reti nya kitai ulih lantang pia aja lalu ngarapka penyulut ti udah ditempa deka nyadi baru kediri jemah ila.
“Ke amai nya, kitai deka betapi enggau mayuh macham pemar baru ti nentuka kitai seruran neresa penemu ti pemadu baru, ngaga inovasyen lalu bebendar dalam ngelui garis penyulut,” ku iya nambah.
Beserimbai enggau tu, Prinsipal SMK Bandar Sarikei Rohani Busri nengah jaku pengelalu iya madahka pengerami tu iya nya legit dalam pengawa ngenukuka ari raban sekula ba penyulut enggau sukung nembiak dalam bidang kurikulum, kokurikulum sereta mega pemanah ulah.
Ku iya, ngarapka tu deka meri peransang ngagai semua ngambika terus belajar enggau bebendar agi dalam ngangkatka nama sekula.
“Penyulut nembiak ukai semina dipeda ari sukut akademik aja tang mungkur kaul dalam bidang kokurikulum sereta lumba enggau main.
“Kitai ngarapka semua raban ulih bekerejasama begulai dalam ngemansangka agi potensial sereta pengelandik bala nembiak di sekula tu nyentuk jemah ila,” ku Rohani.
Sama bisi dalam pengerami tu iya nya Chairman (YDP) Gerempung Apai Indai enggau Pengajar (PIBG) SMK Bandar Sarikei Ling Wen Kwang, Penulung Kanan Administrasyen SMK Bandar Sarikei Hamidi Jelani enggau raban sekula ke bukai.