Pengempu tanah NCR Iban dipinta meri kerejasama ngagai JTS
Sapit Premier Datuk Amar Douglas Uggah Embas minta sida ti ngempu tanah hak adat bansa asal (NCR) Iban ba bagi menua Serian ngambika meri kerejasama ngagai Opis Tanah enggau Survei (JTS).
“Kita ulih milih dalam nitihka modul Gerempung Nasional Dayak Bidayuh (DBNA) dalam ngelengkaska proses nengah peminta kita.
“Aku nguna modul tu di kandang menua Bukit Saban kealai kami ngaul sida ti ngembuan penemu dalam pengawa nyukat tu ngambika bekerejasama enggau raban Opis Tanah enggau Survei sereta sida ti ngempu tanah tu.
“Kami udah ngatur enggau manah dalam ngelengkaska proses,” ku iya lebuh ti bejaku ba pengerami makai lemai Gerempung Ketuai Komuniti enggau Tuai Rumah Panjai Iban Bagi Menua Serian kena malam Hari Enam.
Uggah mega madah, naka diatu urung 2.6 juta ikar tanah NCR di selampur nengeri udah disukat kelingi ari baruh Seksyen 6 Kanun Tanah Nengeri.
“Kitai ngembuan 2.1 juta ikar udah digazet nyadi Rizab Komunal Bumiputera (Betanam Betupi) ari baruh Seksyen 6 Kanun Tanah kitai.
“Bisi 250,000 ikar agi udah disukat ari baruh Seksyen 18 lalu diberi surat pala tanah.
“Lalu jaku tangkan ngagai pengempu ke udah bulih surat pala tanah, kerejaka mih tanah kita ungkup sebarang aktiviti betanam betupi ngambika kita bulih penatai pemisi,” ku iya.
Sama datai, iya nya Menteri Pelajar, Inovasyen enggau Pemansang Penau Dato Sri Roland Sagah, Sapit Menteri Industri Pemakai, Komoditi enggau Pemansang Kandang Menua Datuk Martin Ben enggau Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan.
Maya pengerami tu, Uggah udah nyuaka chek sepenyampau RM30,000 ungkup gerempung dalam mayar ungkus mayuh macham aktiviti enggau tiga set pemacha mudah alih (GPS) dikena mantu sida dalam proses nyukat tanah NCR sida.
Pia mega Snowdan udah besemaya deka meri RM20,000 lalu bela RM10,000 iya nya ari Sagah enggau Martin ungkup gerempung tu.