Raban nembiak rebak baru patut diajar bekaul main asal, identiti bansa diri
Mayuh macham main asal enggau seni di Sarawak patut diajar ngagai nembiak rebak baru dikena nentuka penatai asal tauka identiti bansa diri empu terus tejaga.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, raban tu patut dipeturunka laban ngemeranka main asal tradisional sekeda komuniti tu mantaika ulah sereta identiti sesebuah raban bansa.
“Di Sarawak, kitai ngembuan 34 raban etnik, enggau Orang Ulu tu entara raban bansa nya. Berindik ari tu semua raban kelebih agi rebak ti tuai patut megai tanggungpengawa enggau nentuka budaya sereta seni tradisyen tetiap raban bansa dipelajarka ngagai nembiak rebal baru diatu.
“Ambika chunto dalam seni betanda tetiap raban bansa tu ngembuan tanda tradisional, kereban muzik enggau asil pengelandik jari diri empu ke ulih diajar kitai ngagai bala anak kitai ngambika enda lenyau diserunyut jeman.
“Nya alai, jaga mih pesaka main asal kita laban tu iya nya reta ti chukup berega,” ku iya lebuh bejaku maya pengerami Malam Penyerakup Etnik Orang Ulu Sarawak di Dewan Gerempung Nasional Dayak Bidayuh (DBNA) ba Jalai
Ong Tiang Swee ditu, kena malam Hari Enam.
Pengerami Malam Penyerakup tu ti keterubah diatur Gerempung Pesaka Main Asal Orang Ulu (PEWAKOUS).
Beserimbai enggau tu, Snowdan ngelalau bala nembiak Sarawak ti nampung pelajar di Senenanjung Makaysia tauka menua luar ngambika mantai budaya ke bisi di nengeri tu.
Ku iya, sida ulih nentuka tu enggau ngena ngepan traditional
raban bansa diri empu.
“Enggau tu, ukai semina ulih mantaika penyelai baju asal tang mega ulih mantaika identiti budaya etnik di Sarawak.
“Enda ngira sekalika Iban, Bidayuh, Orang Ulu, China, Melayu tauka Melanau bai mih ngepan ke universiti kita,” ku iya.
Ba pengerami tu, Snowdan udah meri agih belanja dana sepenyampau RM30,000 ungkup PEWAKOUS.
Beserimbai enggau tu Kaban Kunsil Nengeri (ADUN) Opar Billy Sujang ti sama mega datai ba pengerami tu mega meri dana sepenyampau RM10,000 kelai meri sukung ngagai gerempung tu aru sukut aktiviti sida ti ngelaku tauka ngangkatka budaya enggau pesaka Orang Ulu.
Sama bisi datai maya nya Penyanding Penemu PEWAKOUS Datin Sri Hau Ngo enggau temuai dipebasa ke bukai.