JKR Sarawak dipinta ngaduka baru Jematan Nanga Tisa sebedau Gawai
Ngambika peranak ari dua buah rumah panjai ti udah putus penyambung ulih nengah jalai nya ke rumah panjai sida sebedau pengerami Gawai kena 1 Jun
KAPIT: Menteri Kereja Raya, Dato Sri Alexander Nanta Linggi minta Opis Kereja Raya (JKR) Sarawak ngenyampatka pengawa ngaduka baru Jematan Nanga Tisa di Sungai Yong ditu ti runtuh kena 4 Mac apin lama.
Iya madahka, nya ngambika peranak ba kandang menua nya ti udah putus penyambung ulih nengah jalai nya ke rumah panjai sida sebedau pengerami Gawai kena 1 Jun ila.
“Pekara tu udah ngujungka peranak ari dua buah rumah panjai ke semak nya putus penyambung pengudah jematan nya runtuh.
“Baka ti udah dipadah opis ti bekaul, jalai sementara tauka ngelaung bisi digaga kena nentuka aktiviti tama pansut peranak ari enggau ngagai rumah panjai nya ulih dipejalaika,” ku iya nengah siti penerang dalam Facebook iya kemari.
Iya ti ngabas kediri empu pekara ti nyadi nya madahka, kereja meresa tauka nisih struktur tanah enggau ti bukai kena nentuka ulih diaduka baru benung dipejalaika opis ti bekaul.
Berebak enggau tu Kaban
Parlimen Kapit nya mega ngelalau semua peranak patut nitihka lalau tauka atur opis ti bekaul sereta seruran ngadang tauka bejimat pasal tanda jalai ti bisi diengkah dikena nyeliahka ari sebarang penanggul ke ulih nyadi.
Nambah nya, Nanta mega bisi ngabas 38 pintu bilik di Rumah Ngelai, Nanga Tisa di Sungai Yong ti diau ba rumah panjai baru ke baru tembu digaga sida sereta iya ngemendarka pemeri RM10,000 ngagai Komiti Pemansang enggau Pengelikun Genturung Pendiau (JKKK) rumah panjai nya.
Tiap pintu rumah panjai nya mega bisi diberi iya RM1,000 sereta iya ngarapka ngena pemeri nya ulih mantu ruang bilik nambahka pengelantang di rumah diri empu.
Udah nya, Nanta mega bisi ngelawa Rumah Ngindang di Sungai Sut sereta ngemendarka geran sepenyampau RM113,000 ke guna peranak rumah nya.
Kelimpah ari nya, iya mega bisi ngetu ngabas siku peranak ti sakit ba Rumah Nyawai, Sungai Sut.
Nanta berebak enggau tu bebendar madahka pengawa nyendiaka kereban infrastruktur nyengkaum endur diau, jalai ti manah sereta kandang endur diau ti lantang ungkup peranak Kapit seruran dikemeratka iya ti nyadi pengari rayat, enggau iya besemaya nguji deka suah pulai ngabas rayat dalam sitak iya.
Taja pia, ku Nanta, nyema iya enda ulih ngamatka nya, iya tetap deka ngenukuka pengelantang pendiau peranak Kapit terus dijaga nengah Sekretari Politik iya Ambrose Abong Bugek ti suah ngarika iya mendingka sebana rayat di sitak Parlimen Kapit. — Bernama
“Pekara tu udah ngujungka peranak ari dua buah rumah panjai ke semak nya putus penyambung pengudah jematan ” nya runtuh. Dato Sri Alexander Nanta Linggi Menteri Kereja Raya