KRT DUN Tanjong Batu nerima ungkup belanja MRP

BINTULU: Kawasan Rukun Tetangga (KRT) Kunsil Nengeri (DUN) Tanjong Batu nerima ungkup belanja projek mit menua pesisir (MRP) baka ti dipinta KRT nya.

Kaban Kunsil Nengeri (ADUN) Tanjong Batu, Johnny Pang madahka, ungkup belanja nya dikena mantu KRT bejalaika mayuh aktiviti iya nya sebaka enggau ke diberi ngagai Komiti Pemansang enggau Pengelikun Genturung Pendiau (JKKK).

“Taun tu, aku bisi meri semua JKKK sitak Tanjong Batu iya nya tiap tumpuk pendiau nerima RM10,000 tang ungkup belanja nya enda chukup dibagi laban KRT mega begunaka ungkup belanja tambah,” ku iya.

Iya madahka pekara nya maya bejadi Program Gerak

Rahmah: Jom Masak Bubur Lambuk Perpaduan 2024 diatur begulai KRT Kampung Jabai, JKKK Kampung Jabai enggau Masjid Darul Islam Kampung Jabai ditu lemai ensanus.

Berindik ari nya, Pang ngagihka ungkup belanja sepenyampau RM6,000 ngagai tiap KRT ti ukai semina ngagai tumpuk pendiau tang mega nyengkaum kandang genturung pendiau terus aktif laban iya nyukung aktiviti KRT.

“Sebedau nya, aku deka betemu enggau semua KRT sereta bala kaban aktif semua KRT Tanjong Batu sebedau ungkup belanja nya diberi.

“Aku beterima kasih laban dikangau bejadi program nyerumba Ramadan tu sereta meri tabi puji ngagai pengatur program tu ke udah mujur ngatur ia,” ku iya.

Program nya ngayanka penyerakup dalam siti raban sereta ngarapka ulih diatur baru ba taun ti bukai laban nya ulih nanggam kaul peranak ba endur nya empu.

Ba program nya bisi 200 bungkus bubur pedas enggau bubur cha cha (nganti bubur lambuk) diberi ngagai peranak Kampaung Jabai.

Sama bisi datai Tuai Raban Bansa ti mega nyadi Chairman KRT enggau JKKK Kampung Jabai, Johny Jimoi; Pegawai Opis Penyerakup Bagi Menua Bintulu, Khairunnisa Idil; Penolong Pegawai Opis Penyerakup Bintulu, Susilia Tini Batholomew; Sekretari Politik ngagai Premier Sarawak, Angellie Stephen Raja enggau Pegawai Khas Kaban Parlimen Bintulu, Azman Abdul Rahman.