Sarawak nyukung PADU, tang patut dipejalaika enggau bejimat
KUCHING: Perintah Sarawak dalam prinsip nyukung tuju manah perintah besai ti nulung rayat ke begunaka bantu nengah Pangkalan Data Utama (PADU).
Sapit Menteri ba Opis Premier Sarawak (UndangUndang, MA63 enggau Kaul Sarawak-Perintah Besai) Datuk Sharifah Hasidah Sayeed Aman Ghazali taja pia madahka, ia patut dipejalaika enggau bejimat kena nyeliahka individu ke patut dibantu ari teberayan nerima subsidi besaran.
Enggau bebendar iya madahka pekara nya beguna dikena nentuka rayat Malaysia ke patut dibantu enda teberayan ari nerima subsidi besaran bepelasarka tikas belanja enggau ekonomi individu.
“Dalam prinsip Perintah
Sarawak nyukung tuju manah perintah besai ti deka nentuka puncha perintah kena mantu Rayat Malaysia diberi enggau kena tauka efektif.
“Taja pia patut dipejalaika enggau bejimat. Ngumpul data diri empu tauka personal semua rayat Malaysia dalam siti pangkalan data besai patut disikap ngena tikas pengelikun enggau penyaga data ti tinggi,” ku iya nengah penerang berita, kemari.
Sharifah Hasidah madahka, kena nentuka subsidi besaran, penerang ekonomi enggau tikas belanja amat beguna tang enda nyentuk mantai tauka ngayanka profil diri empu ke enda patut dalam nentuka individu nya patut nyadi penerima tauka enda (subsidi besaran).
Iya mega madahka diatu apin bisi undang-undang khas ti nyaga privasi diri empu rayat enti sida ngerejista PADU.
Iya madahka nadai undangundang khas data diri empu rayat bisi risiko tiris tauka pantis, salah kena enggau nyadi orang kena tipu online (scam).
“Enda baka bidang kuasa bukai, Malaysia nadai undang-undang khas baka Akta Privasi dikena nyaga privasi diri empu, kelimpah ari Akta Perlindungan Data Peribadi 2010 (PDPA) ti nyaga proses data diri empu bekaul enggau transaksyen komersial sereta nyendiaka prinsip nyaga data nyengkaum setuju, tuju enggau pengelikun data,” terang iya.
Nitihka iya. ketegal PDPA iya ti semina undang-undang besai bekaul enggau pengawa nyaga data di Malaysia, nyentuk kediatu PDPA suah nyadi sanding pekara bekaul enggau nyaga data sereta privasi.
“Tu ti salah anggap mensia mayuh, iya nya PDPA iya nya undang-undang hak privasi.
“Taja pan privasi enggau data privasi ulih sama bekaul, PDPA cempit dalam aplikasyen ia laban ia bekaul enggau privasi data privasi enda setipak enggau hak privasi keselalu,” ku iya.
Sharifah Hasidah bejaku baru madahka, taja nadai prinsip bekaul enggau hak privasi di Malaysia, kes Kot Perintah Besai, Sivarasa Rasiah ngelaban Badan Peguam Malaysia & Anor (2010) 3 CLJ 507 bepenemu iya nya hak bebas privasi ari baruh Perkara 5(1) Perlembagaan Persekutuan ngemasukka hak privasi.
Bebendar iya madah ngena undang-undang ti bisi tatak pasal nyaga enggau privasi data, nya alai bisi pengirau orang bekunsi data enggau penerang diri empu.
“(Nya alai) pengirau ti dipadah Perintah Sarawak enggau raban bansa (bekaul aspek pengelikun data) iya nya sah laban kes bekaul enggau ngena chara salah data, data tiris enggau kena tipu mayuh nyadi diatu,” ku iya.
Lalu, ku iya, penerang ari Opis Menteri Ekonomi Malaysia beguna bekaul enggau aspek pengelikun enggau protokol bekaul awakka perintah Sarawak nyukung inisiatif perintah besai nya.
Tu amat beguna laban Perintah Sarawak mega nyaga rayat iya, ku Sharifah Hasidah.
Apin lama Perintah Sarawak minta ngambika pengawa ngerejista enggau ngemaruka PADU di Sarawak ditangguh.
Kena Hari Lima (22 Mac 2024) media ngeripotka Residen Sri Aman Abang Mohamad Porkan Abang Budiman madah diri amat bisi ngeluarka memorandum minta adminstrasyen bagi menua enda ngerejista penerang dalam PADU nyentuk jaku tesau dikeluarka baru.
Iya madahka penerang ti udah disadung ngerembai nya dituju ngagai pegawai opis pelilih menua enggau pegawai tadbir di bagi menua nya sereta ukai ngagai orang bukai di luar Sri Aman.
“Ia dikeluarka laban ti ngembuan niat manah kena nyaga rayat kitai.
“Kitai ulih ngerejista PADU sekali agi enti bisi padah ari opis ti bekaul di nengeri pengudah mansik juluk PADU enggau tisih pengelikun ia,” ku iya.