Pengawa munaska epidemik rabies patut dikemerat kena nyapai tagit Sarawak nadai rabies 2030: Buckland
Pengawa ngemunaska epidemik rabies endang patut dikemeratka kena nyapai tagit nadai tauka sifar rabies lebuh manggai taun 2030, ku Sapit Sekretari Perintah Sarawak (Administrasyen), Datu Buckland Bangik.
Kena nyapai tagit nya, operasyen rintis kena neritka undang-undang begulai rabies di Sarawak deka dipejalaika berengkah di Kuching ari 29 April ngagai 3 Mei ti deka datai.
Ari baruh operasyen nya, perintah Sarawak nengah Komiti Ngatur Penusah Ngenyit Nengeri Sarawak (JPBNS) begulai enggau ejensi ti bekaul deka ngiga ukui tupi ti bedau diberi vaksin enggau lisin.
“Batang tuju kitai bejalaika operasyen rintis tu di Kuching iya nya kena ngemunaska terus epidemik rabies di Sarawak ke lalu dikena ngulihka tagit nadai rabies lebuh manggai taun 2030,” ku Buckland.
Iya madahka pekara nya maya bejaku ba pengawa ‘Taklimat Persediaan Operasi
Penguatkuasaan Bersepadu Rabies Sarawak’ ti diatur di Wisma Sabati ditu, kemari.
Ngenang silik, Buckland ti mega Sapit Chairman JPBNS madahka operasyen rintis nya deka nyadi penyukat banding tauka ‘benchmarking’ ngagai operasyen begulai ti dipelaba dipejalaika di semua pelilih
menua dudi hari.
Ari operasyen rintis nya ila, ku iya, pengawa penisih deka dipejalaika kena ngelala bagi pengelemi ke patut dikemanahka agi sereta nentuka sekalika operasyen tu ulih dikerembai ngagai pelilih menua bukai di serata Sarawak.
Dalam aum pengawa meri
penerang nya, Buckland ngelalau ejensi ti bekaul ngambika gawa nyadi siti tim tauka raban.
Sama bisi datai, Sapit Direktor Opis Servis Veterinar Sarawak, Dr Nicholas Jenek enggau Tuai Pegawai Pengerai Rampa Menua OPis Pengerai Nengeri Sarawak, Raphael Engkayau.