Langgur Betong nyadi pengeluar asil pemakai, produk pemakai besai Sarawak pelasar ti betul
Langgur Bagi Menua Betong nyadi pengeluar asil pemakai enggau produk pemakai besai di nengeri tu ba pelasar ti betul, ku Sapit Premier Sarawak Datuk Amar Douglas Uggah Embas.
Nitihku iya, sebuah kompeni pemansik enggau pemansang ari Semenanjung udah numbuhka stesyen sida iya ditu, ti seraya mantu langgur tu.
Kompeni nya ti nyual leka benih ke serata dunya, ku iya, mega deka nyadi kompeni besai nyendiaka leka benih.
“Kitai chukup untung laban diatu bisi kompeni Green World Genetics (GWG) udah berengkah bejalaika pugu dagang sida iya mansik, ngemansang enggau ngemansutka mayuh bansa leka benih buah enggau sayur tropika ti bekualiti tinggi di atas plot pemesai 27.59 hektar di Simpang Debak kenyau tiga taun ke udah.
“Entara sayur, buah enggau utai tanam ti dipilih sida iya nya entimun, retak, rungan, jagung enggau padi.
“Di Bagi Menua Betong kelebih agi di Bukit Saban, kami meda mayuh potensyel tauka peluang dalam industri ngeluarka leka benih baru tu. Makit alai nyual leka benih bekualiti tinggi mega besai sereta leka benih ti baka tu mar agi,” ku Kaban Kunsil Nengeri (ADUN) Bukit Saban nya.
Pekara nya dipadahka iya pengudah nyuaka geran projek menua pesisir sepenyampau RM1.1 juta ngagai mayuh bengkah organisasyen, sekula enggau komiti pemansang enggau pengelikun genturung pendiau (JKKK) ditu, Hari Tiga.
Kaban Parlimen Betong Dr. Richard Rapu ti nyempulang Uggah ba pengerami nya bisi ngungkupka sepenyampau RM87,000.
Nambah nya, Uggah madahka sida bisi perambu meransang pedaja tauka penyual barang nyadi pekebun kontrak, sereta kompeni nya deka nyendiaka latih ti diguna.
“Sida deka nyual leka benih ngagai kompeni ti deka bejalaika proses enggau mungkus ngena chara ti betul, lalu ti pemadu beguna iya nya dijual ngagai makit luar.
“Begulai enggau Opis Betanam Betupi ditu, kitai ngelala bagi orang bekebun menua tu empu sereta kitai deka berengkah enggau 50 iku raban keterubah taun tu,” ku iya.
Bejaku baru Uggah madahka iya enggau Dr Richard bepenemu tu sebengkah industri baru ti bisi potensyel pemadu besai ti mesti diserungkai enggau dikemeranka enggau manah ditu.
Ngenang sekalika orang betanam tauka bekebun deka nerima konsep nya, Uggah madahka, sekeda ari sida nya kala ngelawa stesyen di Simpang Debak sereta gagit ati meda pemansang dia.
Sekeda orang betanam tauka bekebun udah berengkah bejalaika pengawa betanam betupi moden ke diri empu sereta asil chukup meri peransang, ku iya.
Iya madahka, GWG iya nya kompeni dikeempu Malaysia udah bejalaika mayuh aktiviti di Semenanjung, enggau deka ngerembaika agi dagang sida di nengeri tu.