Niang Joanna mujur dikuburka ngena adat basa TLDM
Penyinu, penusah ati mensia mayuh ulih dipeda, diasaika maya niang dibai sepemanjai pejalai ari rumah nyentuk ke pendam
SERIAN: Niang Laskar Kanan (LK) JJM Joanna Felicia Rohna, ari Kampung Sumpas Tampek, ti bebadi nyawa ba penusah bilun engkabang di Lumut Perak kena Hari Dua apin lama, mujur dikuburka di Tanah Pendam Kristian, Kampung Engkeroh ditu urung pukul 11.30 pagi kemari.
Peranak genturung pendiau ke bisi datai meri basa kepenudi sama sinu enggau tusah ati maya niang dibai sepemanjai pejalai ari rumah sida iya di Kampung Engkeroh nyentuk ke tanah pendam.
Niang ti bisi dua iku anak ke agi mit nya datai ba tanah pendam urung pukul 10.35 pagi sereta pengawa nguburka niang diatur ngena adat basa Soldadu Tasik Diraja Malaysia (TLDM).
Sentubung niang, 26, disan anggota TLDM enggau pengawa nguburka nya mega dibantu anggota ari Divisyen Pertama Infantri Malaysia (1 Div).
Raban ti mantu ba pengawa nguburka nya bisi 78
anggota ti nyengkaum 17 iku pegawai enggau 61 anggota lain pangkat.
Maya atur pengawa nya, Laksamana Pertama Ir Ts Franklin Jeyasekhar Joseph ngarika TLDM nyuaka Bendera Ensign (Panji-Panji TLDM) ngagai laki niang, Hasley Ali, ti nyadi kelai basa kepenudi.
Sama bisi datai meri basa kepenudi, iya nya Kaban Parlimen Serian Dato Sri Dr
Richard Riot Jaem, Panglima Divisyen Pertama Infantri Malaysia Mejar Jeneral Datuk Mohamed Fauzi Kamis enggau Penyanding Penemu Gerempung Veteran Soldadu Kor Renjer Datuk Stephen Mundaw.
Ensanus (Malam Hari Tiga), bilun C-130 Tentera Udara Diraja Malaysia (TUDM) ti mai niang ari Ipoh, Perak datai di Pangkalan Udara TUDM, Kuching
urung pukul 11.54 malam.
Niang udah nya terus dibai ke Kampung Engkeroh, Tebakang, Serian sereta datai urung pukul 2.08 pagi kemari.
Sebedau dibai pulai ke Kuching, niang dulu di ‘post-moterm’ di Hospital Raja Permaisuri Bainun, Ipoh, Perak.
Niang Joaana siku ari 10 ti bebadi nyawa ketegal penusah bilun engkabang
TLDM belantak lalu terempas maya belatih kena ngintu genap ke-90 TLDM , kena pagi Hari Dua apin lama.
Penusah nya nyadi urung pukul 9.30 pagi, dua buah bilun engkabang iya nya bilun HOM (M503-3) mai empat kru enggau tiga ti numpang enggau bilun Fennec mai tiga kru ti belantak di langit sebedau terempas di Pangkalan TLDM Lumut.
Berindik ari insiden nya,
pengerami ngintu genap ke90 taun TLDM ti ditimpuhka diatur kena HAri Enam tu udah dikinsil lalu diganti ngena pengawa besembiang enggau tahlil ungkup sida ti bebadi nyawa nya.
Kelimpah ari niang Joanna, sida ti bukai ke bebadi nyawa iya nya Komander Muhammad Firdaus Ramli, Komander Muhamad Amir Mohamad, Leftenan Komander Wan Rezaudeen
Kamal Wan Zainal Abidin, Leftenan Komander Mohammad Amirulfaris Mohamad Marzukhi, Leftenan Sivasutan Thanjappan, Pegawai Waran II TLR (AQM) Muhammad Faisol Tamadun, Pegawai Waran II TNL Noorfarahimi Mohd Saedy, Pegawai Waran II TMK Mohd Shahrizan Mohd Termizi enggau Bintara Muda TNL Noor Rahiza Anuar.