Sarawak ulih ngeluarka SSR beras ba taun 2027: Premier
Bisi projek nanam padi chara baru iya nya ngena benih hibrid ti udah dipejalaika di sekeda kandang endur di nengeri tu
KUCHING: Sarawak dipelaba ulih nyapai proses ngeluarka Tahap Sara Diri (SSR) Beras lebuh manggai taun 2027, sereta enda agi bepanggai ngagai beras import.
Premier Sarawak, Datuk Patinggi Tan Sri Abang Johari Tun Openg madahka, nya berindik ari projek nanam padi ngena benih hibrid ti udah dipejalaika di sekeda kandang endur di nengeri tu.
Ku iya, ari nya mega Sarawak ulih nyual tauka eksport beras ke menua bukai.
“Ari sukut penentu penyukup pemakai kitai, kitai udah bejadika ekonomi gadung. Di Gedong ambika banding kitai ngena chara baru ba pengawa nanam padi, sida ulih ngeluarka lapan tan semusin.
“Ngena chara baru tu, dalam 24 bulan bisi lima musin sereta dalam timpuh nya (lima musin) sida ulih ngeluarka 40 tan padi. Enti kitai, urung ba taun 2026 tauka 2027 kitai ulih nyapai Tahap Sara Diri beras enggau enda ibuh agi meli tauka ngimport,” ku iya.
Iya madahka pekara nya maya bejaku ba Majlis Ramah Tamah Aidifitri Daerah Sebuyau ti bisi digulu Tuai Pemegai Menua, yang dihadiri Yang di-Pertua Negeri, Tun Pehin Sri Dr Wan Junaidi Tuanku Jaafar enggau bini iya, Toh Puan Fauziah
Mohd Sanusi di Dewan Pembangunan Sebuyau, kemari.
Nitihka Abang Johari, Sarawak dipelaba ulih nyapai SSR nya laban projek nanam padi nya ukai semina di Lubok Punggor di Gedong tang mega di kandang endur bukai ti udah ditemu tauka dikelala.
Entara kandang endur nya nyengkaum di Simunjan, Lundu, Banting sereta Lingga ulih ngeluarka beras sekali lipas mayuh ari penyampau ti diimport diatu.
“Nya alai kitai engka nyadi penyual tauka pengeksport beras ngagai orang bukai di luar,” ku iya.
Kelimpah ari nya bekaul enggau peminta Menteri Utiliti enggau Telekomunikasyen, Dato Sri Julaihi Narawi ti mega Kaban Kunsil Nengeri (ADUN) Sebuyau pasal peminta nganti penuh tauka ngaga baru Sekolah Menengah Sebuyau, Abang Johari madahka, perintah nengeri udah setuju.
Ku iya, projek nya deka digaga ngena ungkup belanja
ari perintah nengeri dulu.
“Sarawak dulu (ngaga sekula tu) udah nya kitai deka minta perintah besai mayar pulai ngagai kitai, sereta sida (perintah besai) udah setuju.
“Ketegal (perintah besai) setuju, aku berani nguna duit kitai dulu kena ngaga sekula di Sebuyau.
“Aku udah nanya Sekretari Perintah Nengeri kitai, anggar ngaga projek tu sereta iya madah entara RM50 juta ngagai RM60 juta,” ku iya.
Berindik ari pekara nya
Abang Johari udah minta Sekretari Perintah Nengeri madah ngagai Direktor Pelajar Nengeri pasal pengawa ngaga projek sekula nya.
Ku iya sebedau tu, iya besebana tauka madah ngagai Menteri Besai, Datuk Seri Anwar Ibrahim iya nya pelajar amat beguna ngagai Sarawak tang agi mayuh sekula ti udah jai.
Nya kebuah, ku iya, iya (Menteri Besai) minta ngambika Sarawak ngena duit diri empu kena ngaga baru tauka ngaduka baru sekula
jai, sereta udah nya minta perintah besai mayar pulai.
“Pengawa ngaga sekula tu ukai semina di kandang menua Sebuyau tang bisi mega di kandang menua bukai baka di Gedong, Simunjan, Bintulu, Mukah enggau di kandang menua ti bukai, iya nya kitai ngaduka baru sekula jai ngena duit Sarawak dulu.
“Semua tu ulih dikereja kitai laban bisi penyerakup tegap ba kitai, ti meri awak ngagai pemesai ngiga belanja kena ngaga infrastruktur ungkup rayat,” ku iya.
“Ngena chara baru tu, dalam 24 bulan bisi lima musin sereta dalam timpuh nya (lima musin) sida ulih ngeluarka 40 tan padi. Enti kitai, urung ba taun 2026 tauka 2027 kitai ulih nyapai Tahap Sara Diri beras enggau enda ibuh agi meli tauka ” ngimport. Datuk Patinggi Tan Sri Abang Johari Tun Openg