DLP Matematik, Sains dikerembai, dipejalaika tekala nya ngagai sekula sekondari di Sarawak
Program Dwibahasa Sarawak (DLP) ti ngena jaku Inggeris kena ngajar Matematik enggau Sains deka dikerembaika ngagai sekula sekondari di serata Sarawak dipejalaika tekala nya, ku Datuk Dr Annuar Rapaee.
Sapit Menteri Pelajar, Inovasyen enggau Pemansang Penau nya madahka, nya seraris enggau batang tuju perintah Sarawak deka ngena jaku Inggeris nyadi pugu jaku ba semua sekula di nengeri tu.
“Program DLP diatu ti dipejalaika berengkah ari Primari 1 ngagai 5 di Sarawak mega deka dikerembai sereta dipejalaika tekala nya ba sekula sekondari di serata nengeri tu.
“Tu siti ari sekeda pekara ti disetujuka perintah besai, ti udah dibantaika Sarawak,” ku Dr. Annuar madah ngagai The Borneo Post kemari.
Kaban Kunsil Nengeri (ADUN) Nangka nya madahka, enggau pengawa bejalaika DLP ba
sekula sekondari, mata pelajar STEM iya nya Matematik Tambahan, Fizik enggau Kimia deka diajar dalam jaku Inggeris.
Ku iya, nya siti agi singkang ti betul kena meransang mayuh agi nembiak rindu belajarka mata pelajar STEM.
Perintah nengeri udah melanjaka sepenyampau RM18 juta dikena bejalaika projek nya nyengkaum nyendiaka kereban, bup enggau ngelatih pengajar.
Kelimpah ari nya, Dr Annuar madahka perintah nengeri udah mantaika 15 pekara ti pemadu komprehensif ngagai perintah besai ti nyadi sebagi ari pekara dirunding dalam Sempekat Malaysia 1963 (MA63) kena mulaika kuasa dalam pelajar.
Tu dalam langkar pengawa Perenggan 17 Laporan Jawatankuasa Antara Kerajaan (IGC) 1962, ku iya.
“Kami bisi merambu deka nukar nya ngagai chara sirkular kena ngelancharka pengawa tu.
“Kami mega benung mansik dipelaba ngemasukka pekara tu ke dalam atur tauka statut ti bekaul kena nentuka ia dipajak enda ngira bisi ubah ba iring tauka perintah,” ku iya maya baum Kunsil Nengeri (DUN) di Kuching Hari Empat.
Dulu ari nya, Dr Annuar nyaut tanya ari Datuk Ding Kuong Hiing (GPS-Meradong) bekaul enggau status meri pulai kuasa autonomi pelajar ngagai perintah Sarawak.