Yang Dipertua Dewan Negara baru apin dikerandau, menua agi masa Datuk Mutang Tagal: Abang Johari

Pengawa nyiri Yang Dipertua Dewan Negara baru apin dikerandauka laban menua agi meri basa ngagai pemidang Datuk Mutang Tagal.

Premier Sarawak Datuk Patinggi Tan Sri Abang Johari Tun Openg madahka, pemutus nyirika nya bepanggai ngagai Yang di-Pertuan Agong pengudah berunding enggau Menteri Besai.

“Naka kediatu, kitai apin berandauka pekara nya, kitai dulu meri basa ngagai Yang Dipertua Dewan Negara ke dulu suba, niang Datuk Mutang Tagal ti baru midang kemari (Hari Lima),” ku iya.

Iya madahka pekara nya maya baum pengarang berita pengudah nyadi chairman Aum ‘Kepimpinan Tertinggi Gabungan Parti Sarawak (GPS)’ ba Indu Opis Parti Pesaka Bumiputera Bersatu (PBB) ditu, kemari.

Sama bisi datai, Sapit Premier Sarawak Datuk Amar Sim Kui Hian ti mega Presiden Parti Rakyat Bersatu Sarawak (SUPP) enggau Datuk Amar Awang Tengah Ali Hasan ti nyadi Sapit Chairman GPS; Tuai Raban Indu PBB Dato Sri

Fatimah Abdullah; Sapit Presiden Parti Demokratik Progresif (PDP) Datuk Henry Harry Jinep; sereta pengari ti bukai.

Kelimpah ari nya, Abang Johari madah diri sempat ngabas niang sebedau niang nya ngapuska seput kepenudi kena Hari Lima.

“Aku sempat betemu enggau niang (Datuk Mutang Tagal) kena Hari Tiga tu tadi. Gaya iya tauka tiaks pengerai iya maya nya balat tang dipelaba ulih diselamat nyema gaya iya majak manah maya nya.

“Taja pia kena Hari Empat, tikas pengerai iya enda stabil ngujungka pengawa beputung besai enda ulih dipejalaika...nya pemutus (nitihka) perubat.

“Enggau pemidang iya, kitai endang lenyau siku tuai ti manah. (Sereta) ba kitai dalam PBB kitai lenyau siku bakih ti tebangkar,” ku iya.

Ngenang sebedau Mutang dichiri nyadi Yang Dipertua Dewan Negara, Abang Johari madahka, pemesai GPS udah meri sadang penemu niang megai pengawa nya ngagai Menteri Besai Datuk Seri Anwar Ibrahim.

“Iya tekenyit sereta enda nyangka pekara nya. Taja semina gawa dua penggal nyadi Kaban Parlimen, iya nerima enggau manah (maya dichiri nyadi Yang Dipertua Dewan Negara).

“Komitmen iya mantu PBB enggau GPS lebih agi raban bansa Lun Bawang enggau Orang Ulu tetap bisi enggau seruran bisi dalam ati niang,” ku iya.

Dulu ari nya, Opis Yang Dipertua Dewan Negara madahka Mutang, 70, midang kena pukul 11.46 pagi Hari Lima di Institut Jantung Negara pengudah diperubat dia pengudah penatai iya ari Azerbaijankena 6 Mei apin lama.

Niang ninggalka bini iya, Datin Ho May Leng enggau tiga iku anak.

Kena 19 Februari taun tu, niang ti kala nyadi Kaban Parlimen Bukit Mas nya dichiri nyadi Yang Dipertua Dewan Negara ke-20 nganti Tun Pehin Sri Dr Wan Junaidi Tuanku Jaafar ti ngelengka penuduk nya pengudah dichiri nyadi Yang Dipertua Negeri Sarawak.

Mutang, ti asal ari Lawan, nempa sejarah nyadi pemesai etnik Lun Bawang keterubah nyadi Yang Dipertua Dewan Negara.