SFCF patut diatur ninting taun nguntungka orang dagang enggau dagang temuai
Festival Pemakai sereta Adat enggau Main Asal Samarahan (SFCF) patut diatur ninting taun berindik ari nerima sukung ti chukup manah sepemanjai ia kala diatur sebedau tu.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, SFCF nya sebedau tu diatur ninting taun kelimpah ari timpuh pengerami diatur patut lama agi.
“Bekaul enggau belanja, endai buh irau sereta opis menteri kami deka sedia mantu ari sukut belanja ungkup festival tu.
“Nya kebuah, Majlis Perbandaran Kota Samarahan (MPKS) patut ngatur pengerami tu ninting taun ti ulih meri penguntung ngagai orang dagang enggau dagang temuai,” ku iya.
Abdul Karim madahka pekara nya maya iya bejaku seraya bejadi Festival Pemakai sereta Adat enggau Main Asal Samarahan (SFCF) ti diatur di Aiman Mall ditu, malam ensanus.
Berebak enggau tu iya ngingatka peranak ti diau di Samarahan ngena peluang iya nya ngambi bagi dalam pengawa betanam betupi di bagi menua tu.
“Enti nyema sida bagas betanam, bebendar sereta nya nadai kebuah sida enda mujur kelimpah ari bebendar nya meri penguntung.
“Kuching sebuah mengeri enggau nadai orang ulih betanam sereta urung 800,000 iku mensia diau di Kuching.
“Sida begunaka sayur, buah enggau ti bukai kelimpah ari utai ke diguna nya dibai ari kandang endur ngelinggi (Kota Samarahan),” terang iya seraya madah, rayat Samarahan patut ngerebut sereta ngena peluang tu enggau manah.
Bekaul enggau SFCF, Chairman Pengatur SFCF, Kaunselor Dr Florince Christy madahka pengerami nya diatur berengkah 10 nyentuk ngagai 19 Mei di Aiman Mall, Kota Samarahan.
“Bisi 57 gerai nyual pemakai enggau ai irup ti ngambi bagi ba festival tu.
“Ti matak ati, pengawa bejual nya nyengkaum bejualka pemakai Melayu Sarawak, pemakai China, pemakai Arab, bakso, pemakai antarabansa baka Thailand, Vietnam, Korea enggau Jepun, nasi ambeng enggau ti bukai,” ku iya.
Sama bisi datai, Sapit Menteri Dagang Temuai, Industri Kreatif enggau Seni Pemerindang, Datuk Snowdan lawan, Chairman MPKS Dato Peter Minos enggau temuyai ti bukai.